Israel Iran Killed: इस्रायल आणि इराण यांच्यातील संघर्ष वाढत चालला आहे. दोन्ही देशांचे एकमेकांवर हवाई हल्ले सुरूच आहेत. या संघर्षात इराणमध्ये शेकडो लोकांचा मृत्यू झाला असून, जखमींची संख्याही प्रचंड वाढली आहे.
'लोकमत'चं WhatsApp चॅनल फॉलो करा!
मानवी हक्क समूहाने दिलेल्या माहितीनुसार, इस्रायलने केलेल्या हल्ल्यांमध्ये आतापर्यंत इराणमध्ये ६३९ लोकांचा मृत्यू झाला आहे. जखमींची संख्या १३२९ वर पोहोचली आहे.
वॉशिंग्टन येथील मानवी हक्क समूहाने ही आकडेवारी प्रसिद्ध केली आहे. मृतांपैकी ज्यांची ओळख पटली आहे, त्यात २६३ नागरिक आहेत. १५४ लष्कराचे जवान आहेत. इराणकडून मात्र मृतांची आकडेवारी देण्यात आली नाही. मृतांच्या आकड्याबद्दल शेवटची माहिती सोमवारी देण्यात आली होती. २२४ नागरिकांचा मृत्यू झाला असून, १२७७ जखमी झाले असल्याचे इराणने म्हटले होते.
इराणमधील न्यूज चॅनेल्स केले हॅक
इस्रायलमधील हॅकर्संनी बुधवारी रात्री उशिरा इराणची सरकारी वृत्तवाहिनी (जशी भारतात डीडी न्यूज, दूरदर्शन आहे.) आयआरआयबी टीव्हीसह इतर काही न्यूज चॅनेल्स हॅक करण्यात आले. न्यूज चॅनेल्स हॅक करून इराणमधील बंडखोरांना आवाहन केले गेले.
हॅक करण्यात आलेल्या न्यूज चॅनेल्सवर इराणमध्ये २०२२ मध्ये झालेल्या जनआंदोलनाचे व्हिडीओ प्रसारित करण्यात आले. या व्हिडीओमध्ये इराणी महिला स्वतःचे केस कापतानाचेही व्हिडीओ होते.
इराण शरणागती पत्करणार नाही -खामेनी
इस्रायल-इराण संघर्षादरम्यान अमेरिकेने इराणने शरणागती पत्करावी असे म्हटले होते. अमेरिकेचा हा प्रस्ताव इराणचे सर्वोच्च नेते अयातुल्लाह खामेनी यांनी फेटाळून लावला. इराण शरणागती पत्करणार नाही, असे खामेनी म्हणाले.