शस्त्रसंधी केली तरी ट्रम्प यांची खुर्ची धोक्यात? ८५ खासदारांनी मागितला राजीनामा; विरोध कायम

America Iran War: शस्त्रसंधीमुळे अमेरिकेतील राजकीय वातावरण तापले असून, डोनाल्ड ट्रम्प यांना पदावरून हटवण्याच्या हालचालींना वेग आल्याचे म्हटले जात आहे.

America Iran War: अखेर अमेरिका आणि इराण यांच्यात शस्त्रसंधी झाली. दोन आठवड्यांसाठी ही शस्त्रसंधी लागू असणार आहे. अमेरिका-इराण तणावाच्या पार्श्वभूमीवर अमेरिकेने भूमिकेत अचानक बदल केला आहे. अमेरिकेचे राष्ट्राध्यक्ष डोनाल्ड ट्रम्प यांनी सध्यापुरती लष्करी कारवाई थांबवण्याची घोषणा केली. दोन आठवड्यांसाठी इराणवरील बॉम्बहल्ले आणि इतर आक्रमणे स्थगित करण्यास सहमत आहे. सर्वसमावेशक युद्धविरामाच्या दिशेने एक पाऊल आहे, असे ट्रम्प यांनी म्हटले आहे. असे असले तरी अमेरिकेच्या ८५ खासदारांनी डोनाल्ड ट्रम्प यांच्या राजीनाम्याची मागणी केली आहे. डोनाल्ड ट्रम्प यांना या युद्धामुळे अमेरिकन नागरिकांचा तीव्र विरोध पत्करावा लागत आहे. हा विरोध अद्यापही कायम असल्याचे म्हटले जात आहे. 

अमेरिकेतील एका गटाकडून युद्धविरामाच्या घोषणेवरून ट्रम्प यांच्यावर टीका होऊ लागली आहे. या संघर्षामध्ये डोनाल्ड ट्रम्प झुकले आणि त्यांनी इराणसमोर सरेंडर केले. इराणविरुद्धच्या युद्धात डोनाल्ड ट्रम्प यांचा पूर्ण पराभव झाला आहे. ट्रम्प यांनी इराणला होर्मुझच्या सामुद्रधुनीचे नियंत्रण देण्यास सहमती दर्शवली आहे. ही बाब संपूर्ण जगासाठी असामान्य आणि घातक आहे, अशी टीका अमेरिकेचे सिनेटर ख्रिस मर्फी यांनी केली आहे. यानंतर डोनाल्ड ट्रम्प यांच्या राजीनाम्याची मागणी करण्यात आली आहे. 

डोनाल्ड ट्रम्प यांना पदावरून हटवण्याच्या हालचालींना वेग

युद्धविरामामुळे इराणमध्ये जल्लोष सुरू असताना अमेरिकेतील राजकारण मात्र तापल्याचे पाहायला मिळत आहे. ॲक्सिऑसच्या अहवालानुसार, ८५ हून अधिक डेमोक्रॅटिक खासदारांनी राष्ट्राध्यक्ष डोनाल्ड ट्रम्प यांना पदावरून हटवण्याची मागणी केली आहे. हे सर्व खासदार विरोधी डेमोक्रॅटिक पक्षाचे असले तरी, ट्रम्प यांना यापूर्वी कधीही इतक्या व्यापक विरोधाच्या दबावाला सामोरे जावे लागले नव्हते, असे म्हटले जात आहे. एपस्टाइन फाइल्समधील कृत्ये लपवण्यासाठी ट्रम्प यांनीच हे युद्ध सुरू केले, असा मतप्रवाह अमेरिकेत असल्याचे सांगितले जात आहे. 

दरम्यान, अनेक अमेरिकी कायदेतज्ज्ञ आणि नेत्यांचे म्हणणे आहे की, ट्रम्प यांचे वारंवार शब्द बदलणे, डावपेच, धोरणे बदलणे आणि इराण युद्धाबाबत अपमानास्पद पोस्ट लिहिणे, यामुळे त्यांच्या मानसिक आरोग्याबद्दल प्रश्न निर्माण होतात. अमेरिकेत एखाद्या व्यक्तीला अध्यक्षपदावरून दूर करणे सोपे नसले तरी, परिस्थितीनुसार वापरता येतील, असे काही नियम आणि कायदे आहेत, त्याचा वापर केला जाऊ शकतो, असे कयास बांधला जात आहे.