इराणचा आतापर्यंतचा सर्वाधिक लांबपल्ल्याचा हल्ला! हिंदी महासागरातील अमेरिकन तळावर 'लॉन्ग रेंज' मिसाईल डागल्या

Iran War: इराणचा हिंद महासागरातील अमेरिकेच्या 'डिएगो गार्सिया' तळावर भीषण मिसाईल हल्ला! डोनाल्ड ट्रम्प यांचे 'मिशन इराण'बाबत मोठे विधान. वाचा सविस्तर अपडेट्स.

मध्य पूर्वेतील युद्धाची धग आता थेट हिंदी महासागरापर्यंत पोहोचली आहे. इराणने शनिवारी अमेरिकेचा सर्वात सुरक्षित समजला जाणारा लष्करी तळ 'डिएगो गार्सिया'वर बॅलिस्टिक मिसाईल्स डागून जगाला हादरवून सोडले आहे. 'वॉल स्ट्रीट जर्नल'ने दिलेल्या वृत्तानुसार, इराणचा हा आतापर्यंतचा सर्वात लांब पल्ल्याचा आणि दुर्मिळ हल्ला मानला जात आहे.

हिंदी महासागरात स्थित असलेल्या अमेरिका आणि ब्रिटनच्या संयुक्त लष्करी तळावर इराणने दोन मध्यम पल्ल्याची बॅलिस्टिक क्षेपणास्त्रे डागली. अमेरिकन अधिकाऱ्यांनी दिलेल्या माहितीनुसार, सुदैवाने ही दोन्ही क्षेपणास्त्रे लक्ष्यापर्यंत पोहोचण्यापूर्वीच निकामी ठरली. मात्र, इराणने आपल्या सीमा ओलांडून इतक्या दूरवर हल्ला केल्याने अमेरिकेच्या संरक्षण यंत्रणेची झोप उडाली आहे.

या भीषण तणावाच्या पार्श्वभूमीवर अमेरिकेचे राष्ट्राध्यक्ष डोनाल्ड ट्रम्प यांनी 'ट्रुथ सोशल'वर एक पोस्ट करत खळबळ उडवून दिली आहे. ट्रम्प म्हणाले की, "अमेरिका मध्य पूर्वेतील आपली लष्करी उद्दिष्टे पूर्ण करण्याच्या अगदी जवळ आहे. आता आम्ही लष्करी मोहिमा 'समाप्तीकडे' नेण्याचा विचार करत आहोत." विशेष म्हणजे, ट्रम्प यांनी हे स्पष्ट केले की हा 'सीजफायर' (युद्धविराम) नाही, तर आपली रणनीती बदलण्याची वेळ आली आहे.

इस्रायलमध्ये मिसाईल्सचा पाऊस; तेल अवीव हादरलेएकीकडे हिंद महासागरात हल्ला झाला असतानाच, दुसरीकडे इराणने इस्रायलवरही आक्रमक पवित्रा घेतला आहे. शुक्रवारी रात्री उशिरा तेल अवीव आणि वेस्ट बँक परिसरात इराणने डझनभर क्षेपणास्त्रे डागली. संपूर्ण इस्रायलमध्ये सायरनचे आवाज घुमत होते आणि भीतीचे वातावरण पसरले होते.

UAE ला थेट इशारा: युद्धाचा विस्तार होणार?इराणने आता संयुक्त अरब अमिरातीला सुद्धा लक्ष्य करण्याची धमकी दिली आहे. इराणच्या मते, यूएई आपल्या भूमीचा वापर इराणच्या बेटांवर हल्ले करण्यासाठी अमेरिकेला करू देत आहे. त्यामुळे रास अल खैमाह या शहरावर थेट हल्ला करण्याचा इशारा तेहरानने दिला आहे.