इराणने संयुक्त राष्ट्रसंघाच्या अणुऊर्जा तपासणी करणाऱ्या संस्थेशी (IAEA) आता संबंध तोडण्याचा निर्णय घेतला आहे. इराणच्या संसदेने बुधवारी (आज) याबाबतचे एक विधेयक मंजूर केले आहे. रॉयटर्स वृत्तसंस्थेने 'नूरन्यूज'च्या हवाल्याने ही माहिती दिली आहे.
युद्धानंतरचा महत्त्वाचा निर्णयइराणचा हा निर्णय अशा वेळी आला आहे, जेव्हा इस्रायलसोबतचे त्यांचे युद्ध १२ दिवसांनी संपुष्टात आले आहे. या निर्णयाची अंमलबजावणी होण्यासाठी इराणच्या सर्वोच्च राष्ट्रीय सुरक्षा परिषदेची अंतिम मंजुरी अजून बाकी आहे.
इराणच्या 'तस्नीम' वृत्तसंस्थेने सोमवारी (२२ जून २०२५) सांगितले होते की, या नवीन नियमांनुसार, इराणच्या अणु-केंद्रांच्या सुरक्षिततेची खात्री मिळेपर्यंत तिथे कॅमेरे लावणे, तपासणीला परवानगी देणे आणि IAEA ला अहवाल देणे हे सर्व थांबवले जाईल. मात्र, यासाठी अजून संसदेच्या पूर्ण सत्रात या विधेयकाला अंतिम मंजुरी मिळणे आवश्यक आहे.
इराणकडे अजूनही अणुबॉम्ब बनवण्याइतकं साहित्य?अलीकडेच इस्रायल-इराण संघर्षादरम्यान अमेरिकेने इराणच्या इस्फान, फोर्डो आणि नतांज या तीन मोठ्या अणु-ठिकाणांवर हल्ला केला होता. अमेरिकेने दावा केला होता की, या हल्ल्यामुळे इराणचे अणुबॉम्ब बनवण्याचे स्वप्न उद्ध्वस्त झाले आहे. पण इराणने हा दावा फेटाळून लावला. अमेरिकेच्या उपराष्ट्रपतींनी असेही म्हटले आहे की, इराणकडे अजूनही इतके साहित्य शिल्लक आहे की ते ९ अणुबॉम्ब बनवू शकतात.