इराण-अमेरिका युद्ध टळले? सैनिक कतारमधील अमेरिकन लष्करी तळावर परतले; इराणनेही हवाई क्षेत्र उघडले

बुधवारी हाय अलर्ट जारी केल्यानंतर कतारमधील अमेरिकेच्या अल उदेद हवाई तळावरील सुरक्षा सतर्कतेची पातळी कमी करण्यात आली, तीन सूत्रांचा हवाला देत या अहवालात असेही म्हटले आहे.

मागील काही दिवसांपासून मध्य पूर्वेकडून धक्कादायक बातम्या येत आहेत, अमेरिका आणि इराणमध्ये तणाव सुरू आहे. अमेरिकेने इराणवर हल्ला करण्याची तयारी केली होती, पण आता ती पुढे ढकलण्यात आली आहे.  एकीकडे, अमेरिकन सैन्य कतारमधील अमेरिकन लष्करी तळावरून माघार घेऊ लागले आहे, तर दुसरीकडे, इराणने त्यांचे हवाई क्षेत्र पुन्हा उघडले आहे. बुधवारी कतारच्या अल उदेद लष्करी तळावरून काढून टाकण्यात आलेली अमेरिकन विमाने हळूहळू तळावर परतत आहेत.

अमेरिका-इराणमध्ये तणाव, इराणने हवाई क्षेत्र केले बंद, एअर इंडिया आणि इंडिगोने ट्रॅव्हल अ‍ॅडव्हायजरी केली जारी

बुधवारी जारी केलेल्या हाय अलर्टनंतर कतारमधील अमेरिकेच्या अल उदेद हवाई तळावरील सुरक्षा सतर्कतेची पातळी कमी करण्यात आली आहे. याव्यतिरिक्त, ज्या कर्मचाऱ्यांना तात्पुरते तळ सोडण्याचा सल्ला देण्यात आला होता त्यांना परत येण्याची परवानगी देण्यात आली आहे.

अमेरिकेचे राष्ट्राध्यक्ष डोनाल्ड ट्रम्प यांनी इराणबद्दलची भूमिका मऊ केल्याचे दिसत आहे. ट्रम्प म्हणाले की, इराणमध्ये निदर्शकांवर झालेल्या कारवाईत मृतांची संख्या कमी होत आहे आणि सध्या सामूहिक फाशीची कोणतीही योजना नाही. ट्रम्प यांनी यापूर्वी इराणला कडक इशारा दिला होता, परंतु आता त्यांनी 'थांबा आणि पहा' धोरण स्वीकारण्याचे संकेत दिले आहेत.

इराणमधील फाशीच्या प्रकरणांवर दिलासा मिळण्याचे संकेत

दरम्यान, इराणच्या परराष्ट्रमंत्र्यांनीही देशात कोणालाही फाशी देण्याची योजना नसल्याचे सांगितले आहे. इराणच्या सरकारी माध्यमांनी वृत्त दिले आहे की, कारज शहरात निदर्शनादरम्यान अटक केलेल्या २६ वर्षीय व्यक्तीला फाशी दिली जाणार नाही. मानवाधिकार संघटना हेंगावनेही निदर्शक एरफान सोलतानीची प्रस्तावित फाशी पुढे ढकलण्यात आल्याची पुष्टी केली आहे.

इराणने हवाई क्षेत्र पुन्हा उघडले

तणावाच्या पार्श्वभूमीवर, इराणनेही एक मोठे पाऊल उचलले आणि सुमारे पाच तासांनंतर आपले हवाई क्षेत्र पुन्हा उघडले. अमेरिका-इराण संघर्षाच्या भीतीमुळे बुधवारी संध्याकाळी उशिरा इराणने आपले हवाई क्षेत्र बंद केले होते, यामुळे असंख्य आंतरराष्ट्रीय उड्डाणे रद्द करावी . फ्लाइट ट्रॅकिंग सेवा फ्लाइटराडार२४ नुसार, हवाई क्षेत्र पुन्हा सुरू होताच अनेक इराणी विमान कंपन्यांनी आपले कामकाज पुन्हा सुरू केले. हवाई क्षेत्र बंद होण्यापूर्वीच्या तुलनेत त्या वेळी इराणवरून उड्डाणांची संख्या लक्षणीयरीत्या कमी झाली होती.