अमेरिकेचे राष्ट्रपती डोनाल्ड ट्रम्प हे सातत्याने इराणला मागे न हटल्यास गंभीर परिणाम भोगावे लागतील असा इशारा देत आहेत. इराण-इस्त्रायल युद्धात अमेरिका उडी घेणार का यावरही ट्रम्प नकार देत नाहीत. त्यातच मध्य पूर्वेत बनलेल्या अमेरिकन तळांवर मिसाईल हल्ल्याची तयारी इराण करत असल्याचे समोर आले आहे. अमेरिकन वृत्तपत्र न्यूयॉर्क टाईम्सनं हा दावा केला आहे. जर इराणने असे काही केले तर डोनाल्ड ट्रम्प यांना एक निमित्त मिळेल आणि अमेरिकादेखील या युद्धात सक्रियपणे उतरू शकते.
अमेरिकेने ३ डझन रिफ्यूलिंग एअरक्राफ्ट युरोपला पाठवले आहेत. ज्याचा मध्य पूर्वेत असलेल्या अमेरिकन तळांचे रक्षण करणाऱ्या फायटर जेटच्या मदतीसाठी वापर केला जाऊ शकतो. सूत्रांनुसार, इराणकडून अमेरिकन तळांवर हल्ला केला जाण्याची शक्यता आहे. इस्त्रायलकडूनही अमेरिकेवर सातत्याने युद्धात उतरण्यासाठी दबाव येत आहे. इराणी मिसाईल हल्ले रोखता रोखता इस्त्रायल एअर डिफेन्सच्या नाकीनऊ आले आहेत. त्याला पुन्हा नव्याने उभं करण्याचीही गरज आहे.
त्याशिवाय जर अमेरिकेने इराणच्या न्यूक्लियर साईटवर हल्ला केला तर लाल समुद्रात हुथी बंडखोरही हल्ले करू शकतात. ते अनेक देशांच्या जहाजांना टार्गेट करू शकतात. सोबतच इराक आणि सीरिया येथील इराण समर्थक जिहाद संघटनाही अमेरिकन ठिकाणांना टार्गेट करू शकते. इराणकडून होर्मुज स्ट्रेट यांनाही रोखण्याचा प्रयत्न होऊ शकतो. सध्या अमेरिका सौदी अरब, जॉर्डन आणि यूएईमधील त्यांच्या सैनिकांना सतर्क राहण्यास सांगत आहे. पश्चिम आशियात अमेरिकेचे जवळपास ४० हजार सैन्य तैनात आहेत.
इराकमधील अमेरिकन तळांवर इराणची नजर
दरम्यान, जर इस्त्रायलच्या समर्थनार्थ अमेरिकेने त्यांचे सैन्य पाठवले तर इराकमधील अमेरिकन ठिकाणांना टार्गेट करण्यात येईल असं २ इराणी अधिकाऱ्यांच्या हवाल्याने न्यूयॉर्क टाइम्स रिपोर्टमध्ये म्हटले आहे. तसेच आमच्या शत्रूंनी लक्षात ठेवावे, केवळ सैन्य बळाने काही मिळवू शकत नाही, जर इराणवर युद्ध थोपवले तर काहीच निष्पन्न होणार नाही असंही त्यांनी सांगितले.