Seyed Abbas Araghchi, Iran Israel War: इराण आणि इस्रायलमधीलयुद्ध पाचव्या दिवशीही सुरूच आहे. दोन्ही बाजूंनी एकमेकांवर जोरदार हल्ले केले जात आहेत. जगातील सुपरपॉवर समजल्या जाणाऱ्या काही बलाढ्य देशांनी इराण आणि इस्रायल या दोन्ही देशांना संयम बाळगण्याचे आवाहन केले आहे, तरीही हल्ले सुरूच आहेत. परंतु हे युद्ध फक्त एका फोन कॉलने थांबवता येऊ शकते असा दावा केला जात आहे. इराणचे परराष्ट्र मंत्री अब्बास अराघची यांनी सोमवारी सांगितले की अमेरिका फक्त 'एका फोन कॉल'ने इस्रायलचे इराणवर होणारे हल्ले थांबवू शकते.
एक फोन कॉल आवश्यक...
"जर राष्ट्राध्यक्ष ट्रम्प राजकीय धोरणांबद्दल प्रामाणिक असतील आणि हे युद्ध रोखण्यात त्यांना रस असेल, तर पुढील पावले परिणामकारक ठरतील. इस्रायलने त्यांची आक्रमणे थांबवावीत. जर आमच्याविरुद्ध लष्करी आक्रमकता सुरू राहिली तर आम्हीही प्रत्युत्तर देतच राहू. इस्रायलचे राष्ट्राध्यक्ष बेंजामिन नेतन्याहू यांच्यासारख्या व्यक्तीला शांत करण्यासाठी अमेरिकेच्या राष्ट्राध्यक्षांच्या कार्यालयातून फक्त एक फोन कॉल आवश्यक आहे. यामुळे युद्ध थांबवता येईल आणि राजकीय ध्येयधोरणांचा मार्ग मोकळा होऊ शकेल," असे अराघची यांनी एक्स पोस्टमध्ये म्हटले आहे.
ट्रम्प यांची इराणला धमकी
दरम्यान, ट्रम्प यांची इराणवर नाराजी स्पष्टपणे दिसून आली आहे. ट्रम्प यांनी सोशल मीडियावर पोस्ट केले आहे की, "मी इराणला ज्या 'करारावर' स्वाक्षरी करायला सांगितली होती, त्यावर इराणने स्वाक्षरी करायला हवी होती. त्यांनी तसे केले नाही आणि आता युद्धात अनेकांचे बळी जात आहेत. सोप्या भाषेत सांगायचे तर, इराणकडे अण्वस्त्र असू शकत नाहीत. मी हे वारंवार सांगितले आहे! प्रत्येकाने ताबडतोब तेहरान सोडले पाहिजे!" अशी पोस्ट ट्रम्प यांनी केली.
दोन्ही देशांचे खूप नुकसान
दरम्यान, इराण आणि इस्रायल यांच्यातील युद्धात इराणचे सुमारे ३० लष्करी अधिकारी आणि शास्त्रज्ञांसह सुमारे २३० लोक मृत्युमुखी पडले आहेत आणि १२०० हून अधिक जखमी झाले आहेत. तर इस्रायलमध्ये २४ हून अधिक लोक मृत्युमुखी पडले आहेत आणि सुमारे २५० जण जखमी झाले आहेत.