इस्रायल आणि इराणमधील संघर्ष दिवसेंदिवस चिघळू लागला आहे. इस्रायलनेइराणमधील अणुऊर्जा केंद्र आणि लष्करी छावण्यांना लक्ष्य करत हल्ल्याची सुरूवात केली होती. यात आतापर्यंत इराणने अनेक महत्त्वाच्या पदावरील अधिकारी आणि अणुशास्त्रज्ञ गमावले आहेत. इस्रायलने अरक शहराजवळ असलेल्या एका अणुऊर्जा केंद्रावरही आता हल्ले केले आहेत. त्यात झालेल्या नुकसानीबद्दल आंतरराष्ट्रीय अणु ऊर्जा संस्थेने माहिती दिली आहे.
'लोकमत'चं WhatsApp चॅनल फॉलो करा!
आयएईएने अर्थात आंतरराष्ट्रीय अणु ऊर्जा संस्थेने इस्रायलच्या हल्ल्यात अणुऊर्जा केंद्राचे नुकसान झाले असल्याचे म्हटले आहे.
अरक शहराजवळील इराणच्या अणुऊर्जा केंद्राच्या काही महत्त्वाच्या इमारतींचे नुकसान झाले आहे, असे या संस्थेने म्हटले आहे.
वाचा >>इराण-इस्रायल युद्धात आता हुकूमशहाची 'एन्ट्री'! ट्रम्प, नेतन्याहूंना दिली थेट धमकी, म्हणाले...
इस्रायलच्या लढाऊ विमानांनी गुरुवारी (१९ जून) अरक हेवी वॉटर रिअॅक्टरवर बॉम्ब वर्षाव केला होता. पण, या केंद्रावर कोणतीही अण्वस्त्र साहित्य नव्हते, अशी माहिती देण्यात आली.
आयएईएचे प्रमुख राफेल ग्रोसी यांनी सांगितले की, इस्रायलच्या हल्ल्यांमुळे आतापर्यंत कोणतीही किरणोत्सर्ग झाल्याची घटना घडलेली नाही. पण, किरणोत्सर्ग होण्याचा धोका अजूनही कायम आहे.
ऑस्ट्रेलियाने उच्चायुक्तालयातील काम केले बंद
इस्रायलकडून होत असलेले हल्ले आणि इराणमधील ढासळत असलेली सुरक्षा व्यवस्था लक्षात घेत ऑस्ट्रेलियाने तेहरानमधील आपल्या उच्चायुक्तालयातील कामकाज बंद करण्याचा निर्णय घेतला आहे.
ऑस्ट्रेलियाचे परराष्ट्र व्यवहार मंत्री पेनी वोंग यांनी सांगितले की, "सद्यस्थितीत आमचे उच्चायुक्तालयातील सेवा देण्याची क्षमता खूपच मर्यादित आहे. हवाई हद्द अजूनही बंद आहे. तेहरानमधील बिघडलेली परिस्थिती लक्षात घेऊन कामकाज थांबवण्यात येत आहे."
ऑस्ट्रेलिया सरकारने तेहरान आणि इराणमधील आपल्या सर्व अधिकाऱ्यांना आणि त्यांच्या कुटुंबीयांना इराण सोडण्याचे निर्देश दिले आहेत. उच्चायुक्तालयातील अधिकारी आता शेजारील देश अझरबैजानमध्ये काम करणार असल्याचे वोंग यांनी सांगितले.