इराण-इस्रायलमध्येयुद्धविराम झाला आहे, त्याला आता दोन दिवस उलटले आहेत. यानंतर एकही हल्ला दोघांकडून झालेला नाहीय. आज तर अमेरिकेचे राष्ट्राध्यक्ष डोनाल्ड ट्रम्प यांनी इराणला आपण तेल विकण्यापासून रोखणार नाही असे म्हणत निर्बंध उठविण्याचे संकेत दिले आहेत. यामुळे जगात कच्चे तेल स्वस्त होण्याची शक्यता निर्माण झाली असताना इराणमधून मोठी बातमी येत आहे.
सर्वोच्च नेते अयातुल्ला अली खामेनी गेल्या आठवड्याभरापासून इराणमध्ये सार्वजनिकरित्या दिसलेले नाहीत. इस्रायलने खामेनी यांच्या सर्व जवळच्या लष्करी अधिकाऱ्यांना संपविले होते. इराणने इस्रायलच्या हॉस्पिटलवर मिसाईल डागल्यानंतर इस्रायलने खुलेआम खामेनींना संपविण्याची धमकी दिली होती. त्यानंतर जे खामेनी बेपत्ता झाले ते अद्याप समोर आलेले नाहीत.
गेल्या आठवडाभरापासून खामेनी हे कुठेही दिसलेले नाहीत ना त्यांचे कोणतेही वक्तव्य आलेले आहे. यामुळे इराणसह मध्यपूर्वेत उलटसुलट चर्चा सुरु आहेत. दरम्यान, इराणने इस्रायलवर मोठा आरोप केला आहे. युद्धबंदी असूनही इस्रायल देशात हेरगिरी करत असल्याचा आरोप इराणने केला आहे.
इस्रायलच्या हेरगिरी कारवाया देशात सुरूच असल्याचे इराणच्या गुप्तचर मंत्रालयाने म्हटले आहे. इस्रायली एजंट मोठ्या संख्येने इराणी नागरिकांना फोन कॉल करत आहेत. त्यांचा उद्देश हेरगिरी करणे आणि फोनद्वारे माहिती मिळवणे आहे, असा आरोप करण्यात आला आहे. दरम्यान इराणने इस्रायली एजंटांची धरपकड करण्यास सुरुवात केली असून सुमारे ३०० लोकांना अटक करण्यात आली आहे, तसेच यापैकी तिघांना फासावर लटकविण्यात आले आहे.