इराणने भारतीयांसाठी व्हिसा-मुक्त प्रवेश केला बंद, २२ नोव्हेंबरपासून नियम बदलतील

इराणने २२ नोव्हेंबरपासून भारतीयांसाठी व्हिसा-मुक्त प्रवेश निलंबित केला आहे. सुरुवातीला पर्यटनाला चालना देण्यासाठी ही सुविधा सुरू करण्यात आली होती. खंडणीसाठी अपहरण अशा अनेक घटनांनंतर, इराणने हा निर्णय घेतला. आता, भारतीयांना इराणमध्ये प्रवास करण्यासाठी व्हिसाची आवश्यकता असणार आहे.

इराणने भारतीय नागरिकांना मोठा धक्का दिला आहे. इराणने २२ नोव्हेंबरपासून आपल्या व्हिसा धोरणात मोठा बदल केला आहे. आता सामान्य पासपोर्ट धारक भारतीय नागरिकांना इराणमध्ये व्हिसामुक्त प्रवेश मिळणार नाही. यापूर्वी, पर्यटनाला चालना देण्याच्या उद्देशाने इराणने फेब्रुवारी २०२४ मध्ये भारतीयांसाठी व्हिसा सूट सुरू केली होती.

भारतातील इराणी दूतावासाने सोशल मिडिया प्लॅटफॉर्म 'एक्स'वरील पोस्टमध्ये म्हटले आहे की, "इस्लामिक रिपब्लिक ऑफ इराणमध्ये सामान्य पासपोर्ट धारक भारतीय नागरिकांसाठी एकतर्फी पर्यटक व्हिसा रद्द करण्याच्या नियमांची अंमलबजावणी २२ नोव्हेंबर २०२५ पर्यंत स्थगित करण्यात आली आहे. या तारखेपासून, सामान्य पासपोर्ट धारक भारतीय नागरिकांना इराणमध्ये प्रवेश करण्यासाठी किंवा संक्रमण करण्यासाठी व्हिसा घेणे आवश्यक असेल.

भारताचा प्रतिसाद

 भारतीय नागरिकांना नोकरी किंवा तिसऱ्या देशात जाण्याचे खोटे आश्वासन देऊन इराणमध्ये आणण्यात आले,  केंद्र सरकारने अशा घटनांकडे लक्ष वेधले असल्याचे परराष्ट्र मंत्रालयाने सांगितले.

"सामान्य भारतीय पासपोर्ट धारकांना उपलब्ध असलेल्या व्हिसा सूट सुविधेचा फायदा घेऊन लोकांना इराणमध्ये प्रवास करण्यास प्रवृत्त करण्यात आले. इराणमध्ये पोहोचल्यानंतर, त्यापैकी अनेकांचे खंडणीसाठी अपहरण करण्यात आले, असे मंत्रालयाने एका निवेदनात म्हटले आहे. 

तेहरानने इराणमध्ये जाणाऱ्या सामान्य भारतीय पासपोर्ट धारकांना उपलब्ध असलेली व्हिसा सूट सुविधा बंद केल्या आहेत. 

गुन्हेगारी घटकांकडून या सुविधेचा आणखी गैरवापर रोखण्यासाठी हे निलंबन आहे. २२ नोव्हेंबरपासून, सामान्य पासपोर्ट असलेल्या भारतीय नागरिकांना इराणमधून प्रवेश करण्यासाठी किंवा पुढे जाण्यासाठी व्हिसा घेणे आवश्यक असणार आहे.

मंत्रालयाने इराणमध्ये प्रवास करू इच्छिणाऱ्या भारतीय नागरिकांना सतर्क राहण्याचा आणि व्हिसा-मुक्त प्रवास किंवा इराणमार्गे तिसऱ्या देशात पुढे जाण्याची ऑफर देणाऱ्या एजंटांपासून दूर राहण्याचा सल्ला दिला आहे.

इराणमध्ये फसवणुकीची प्रकरण

या वर्षी मे महिन्यात, बेकायदेशीरपणे ऑस्ट्रेलियाला प्रवास करणाऱ्या पंजाबमधील तीन लोकांचे इराणमध्ये अपहरण करण्यात आले. पंजाबच्या एका एजंटने हुशनप्रीत सिंग, जसपाल सिंग आणि अमृतपाल सिंग यांना दुबई-इराण मार्गाने ऑस्ट्रेलियाला पाठवण्याचे आश्वासन दिले.

त्याने त्यांना इराणमध्ये राहण्याची व्यवस्था केली जाईल असे आश्वासन दिल्याचे कथित आहे. १ मे रोजी इराणमध्ये पोहोचल्यानंतर लगेचच त्यांचे अपहरण करण्यात आले. पीडितांच्या कुटुंबियांच्या म्हणण्यानुसार, अपहरणकर्त्यांनी १ कोटी खंडणी मागितली.