"अमेरिका आणि इस्रायलसोबत सुरू असलेल्या युद्धात शत्रू देशांचा पराभव झाला आहे," असा दावा इराणचे सर्वोच्च नेते मुजतबा खामेनेई यांनी केला आहे. नौरोजच्या (इराणी नववर्ष) निमित्ताने देशाला उद्देशून लिहिलेल्या पत्रात त्यांनी इराणच्या एकतेचे कौतुक केले असून शत्रूचे मनसुबे धुळीस मिळाल्याचे म्हटले आहे.
खामेनेई यांनी आपल्या संदेशात म्हटले आहे की, इस्रायल आणि अमेरिकेला अशी अपेक्षा होती की इराणवर वारंवार होणाऱ्या हल्ल्यांमुळे तेथील जनता त्रस्त होईल आणि सरकारविरुद्ध बंड पुकारेल. मात्र, प्रत्यक्षात चित्र उलटे दिसले. इराणमधील नागरिक घाबरण्याऐवजी अधिक खंबीरपणे सरकारच्या पाठीशी उभे राहिले, ज्यामुळे शत्रूच्या गोटातच आता भीती पसरली आहे.
'माझाही अंदाज चुकला होता' - खामेनेईंची कबुलीविशेष म्हणजे, खामेनेई यांनी एक कबुलीही दिली आहे. ते म्हणाले, "मला असे वाटले होते की काही दिवसांच्या हल्ल्यांनंतर देशात भीती आणि निराशेचे वातावरण निर्माण होईल आणि लोक सरकारविरोधात उभे ठाकतील. पण माझा हा अंदाज पूर्णपणे चुकीचा ठरला." इराणमधील जनतेने विचारधारेतील मतभेद बाजूला ठेवून जी अभूतपूर्व एकता दाखवली, त्यामुळेच शत्रू आपल्या मोहिमेत अपयशी ठरला आहे.
शत्रूच्या गटात पडली फूट?खामेनेई यांच्या मते, इराणच्या या एकतेमुळे आता इस्रायल आणि अमेरिकेच्या गटातच आपापसात मतभेद निर्माण झाले आहेत. "शत्रूचा हेतू साध्य न झाल्यामुळे त्यांच्या खेम्यात आता दरार पडली आहे," असा दावाही त्यांनी केला आहे.