'हॉटेल जाळले, लोक पर्यटकांनाही सोडत नाहीत'; नेपाळमध्ये अडकलेल्या भारतीय महिलेने सांगितली आपबिती

नेपाळमधील Gen- Z निदर्शनांच्या वेळी पोखरा येथे अडकलेल्या भारतीय महिले उपासना गिलने भारत सरकारकडे मदत मागितली आहे. निदर्शकांनी पर्यटक ज्या हॉटेलला थांबले होते तिथे आग लावल्याचा दावा त्यांनी केला. दरम्यान, भारतीय दूतावासाने नेपाळमध्ये अडकलेल्या नागरिकांसाठी एक सूचना जारी केली आहे.

नेपाळमध्ये सोशल मीडिया बंदीविरोधात मोठे आंदोलन सुरू झाले. मंगळवारी या आंदोलनाने हिंसक वळण घेतले. आंदोलनकर्त्यांनी संसद जाळली. तसेच अनेक शहरातही जाळपोळ केली.  या निदर्शनांचा पर्यटकांनाही फटका बसला आहे. पोखरा येथून एक व्हिडीओ समोर आला आहे. या व्हिडिओमध्ये एक भारतीय महिला भारत सरकारकडे मदतीची मागणी करताना दिसत आहे.

निदर्शकांनी पर्यटक राहत असलेल्या हॉटेलला आग लावल्याचा दावा उपासना गिल नावाच्या या महिलेने केला आहे. ती एका स्पामध्ये होती आणि नंतर लाठ्या घेऊन एक जमाव त्यांच्या मागे धावला. यावेळी त्यांना जीव वाचवण्यासाठी पळून जावे लागले.

नेपाळच्या माजी पंतप्रधानांना पत्नीसह बेदम मारले; जमावाच्या तावडीतून सैन्यानं कसं वाचवले?

ती महिला नेपाळमध्ये व्हॉलीबॉल लीग आयोजित करण्यासाठी आली होती.  महिलेने पुढे सांगितले की, "माझे नाव उपासना गिल आहे आणि मी हा व्हिडीओ प्रफुल्ल गर्ग यांना पाठवत आहे. मी भारतीय दूतावासाला विनंती करते की, कृपया आम्हाला मदत करा. जो कोणी आम्हाला मदत करू शकेल त्याने कृपया मदत करा. मी नेपाळमधील पोखरा येथे अडकलो आहे. मी येथे व्हॉलीबॉल लीग आयोजित करण्यासाठी आली होती आणि मी ज्या हॉटेलमध्ये राहत होती ते जळून खाक झाले आहे. माझे सर्व सामान, माझे सर्व सामान माझ्या खोलीत होते आणि संपूर्ण हॉटेलला आग लागली. मी स्पामध्ये होते. यावेळी लोक मोठ्या काठ्या घेऊन माझ्या मागे धावत होते.  मी माझा जीव वाचवण्यात क्वचितच यशस्वी झाले, असंही तिने सांगितले.

मदत करण्याची विनंती

इथे परिस्थिती खूप वाईट आहे. सगळीकडे रस्ते पेटवले जात आहेत. ते इथल्या पर्यटकांनाही सोडत नाहीत. त्यांना कोणी पर्यटक आहे की कोणी कामासाठी इथे आले आहे याची पर्वा नाही. ते विचार न करता सगळीकडे आग लावत आहेत आणि इथली परिस्थिती खूपच वाईट झाली आहे. आम्हाला माहित नाही की आम्ही किती काळ दुसऱ्या हॉटेलमध्ये राहणार आहोत. पण मी भारतीय दूतावासाला विनंती करते की कृपया हा व्हिडिओ, हा संदेश त्यांना पाठवा. मी तुम्हा सर्वांना हात जोडून विनंती करते की कृपया आम्हाला मदत करा. माझ्यासोबत इथे बरेच लोक आहेत आणि आम्ही सर्वजण इथे अडकलो आहोत, असंही त्यांनी व्हिडीओत सांगितले आहे.

भारतीय दूतावासाने काय सांगितले?

दरम्यान, काठमांडूमधील भारतीय दूतावासाने नेपाळमधील सर्व नागरिकांना परिस्थिती स्थिर होईपर्यंत नेपाळचा प्रवास पुढे ढकलण्याचा सल्ला दिला आहे. कोणत्याही आपत्कालीन परिस्थितीत किंवा मदतीची आवश्यकता असल्यास भारतीय दूतावास आपत्कालीन संपर्क क्रमांक देखील दिले आहेत.

सोशल मीडिया प्लॅटफॉर्म एक्स वर एक पोस्ट शेअर केली आहे.  या पोस्टमध्ये भारतीय दूतावासाने लिहिले की, "नेपाळमधील सर्व भारतीय नागरिकांना विनंती आहे की, त्यांनी कोणत्याही आपत्कालीन परिस्थितीत किंवा मदतीची आवश्यकता असल्यास काठमांडू येथील भारतीय दूतावासाचे खालील दूरध्वनी क्रमांक लक्षात ठेवावेत: 977 - 980 860 2881, 977 - 981 032 6134."