एपस्टीन फाईल्समध्ये नाव आल्यानं खळबळ; व्हाइट हाउसच्या माजी वकिलाचा राजीनामा

राष्ट्राध्यक्ष बराक ओबामा यांच्या कार्यकाळात रुएम्लर या व्हाइट हाउसच्या मुख्य कार्यकारी सल्लागार होत्या.

न्यूयॉर्क - जगभर खळबळ उडवून देणाऱ्या एपस्टीन फाइल्समध्ये नाव आल्याने प्रसिद्ध गुंतवणूक बँक गोल्डमन सॅक्सच्या मुख्य कार्यकारी सल्लागार व तत्कालीन राष्ट्राध्यक्ष बराक ओबामा यांच्या व्हाइट हाउसमधील माजी वकील कॅथी रुएम्लर यांना शुक्रवारी राजीनामा द्यावा लागला. दिवंगत आर्थिक गुन्हेगार जेफ्री एपस्टीन यांच्यासोबत रुएमलर यांचे जवळचे संबंध असल्याचे ई-मेल संवादातून स्पष्ट झाले आहे. 

हे प्रकरण अंगलट आल्याने रुएम्लर यांच्यावर राजीनामा देण्याची नामुष्की ओढवली आहे. ई-मेलमध्ये त्यांनी एपस्टीनचा मोठा भाऊ व अंकल जेफ्री असा उल्लेख केला होता. एवढेच नाही, तर एपस्टीनच्या लैंगिक गुन्ह्यांचे गांभीर्य कमी करण्याचा प्रयत्न रुएम्लर यांनी केल्याचे काही वृत्तसंस्थांनी म्हटले आहे. 

गोल्डमन सॅक्समध्ये सर्वोच्च पदावरही कार्यरत
राजीनामा देण्यापूर्वी त्यांनी एपस्टीन फाइल्सशी आपला संबंध नसल्याचा दावा केला होता. मी एपस्टीनसोबत कोणताही ई-मेल किंवा पत्रव्यवहार केला नसल्याचे त्यांचे म्हणणे होते. राष्ट्राध्यक्ष बराक ओबामा यांच्या कार्यकाळात रुएम्लर या व्हाइट हाउसच्या मुख्य कार्यकारी सल्लागार होत्या. २०२० पासून त्या गोल्डमन सॅक्समध्ये सर्वोच्च कायदेपदी होत्या.