ट्रम्प-इराण युद्धविरामात पाकिस्तानचा गेम? 'कॉपी-पेस्ट' मेसेजने पोलखोल, शाहबाज यांची स्क्रिप्ट कुणी लिहिली?

इराण आणि अमेरिकेमध्ये युद्धबंदी करण्याच्या प्रक्रियेत पाकिस्तानची विश्वासार्हता पुन्हा एकदा वादाच्या भोवऱ्यात सापडली आहे.

US Iran Ceasefire For 2 Weeks: इराणला उद्धवस्त करण्याचा इशारा दिल्यानंतर डोनाल्ड ट्रम्प यांनी जाहीर केलेल्या दोन आठवड्यांच्या युद्धविरामाने मोठा दिलासा दिला आहे. मात्र, या ऐतिहासिक घडामोडीत मध्यस्थीचा आव आणणाऱ्या पाकिस्तानची एका तांत्रिक चुकीमुळे आंतरराष्ट्रीय स्तरावर नाचक्की झाली आहे. पाकिस्तानचे पंतप्रधान शहबाज शरीफ यांनी सोशल मीडिया प्लॅटफॉर्म एक्सवर केलेल्या एका पोस्टमुळे पाकिस्तानचे परराष्ट्र धोरण इस्लामाबादमधून ठरतेय की वॉशिंग्टनमधून? असा प्रश्न उपस्थित झाला आहे. 

नेमकं प्रकरण काय?

डोनाल्ड ट्रम्प यांनी युद्धविरामाची घोषणा करण्यापूर्वी शहबाज शरीफ यांनी एक पोस्ट केली होती. यामध्ये त्यांनी ट्रम्प यांना इराणवरील डेडलाईन वाढवण्याची आणि मुत्सद्देगिरीला संधी देण्याची विनंती केली होती. तसेच इराणला होर्मुजची सामुद्रधुनी खुली करण्याचे आवाहन केले होते. मात्र, ही पोस्ट प्रसिद्ध होताच नेटकऱ्यांनी त्याची एडिट हिस्ट्री तपासली आणि एक मोठा गौप्यस्फोट झाला. शरीफ यांनी रात्री १२ वाजून ४६ मिनिटांनी केलेल्या पोस्टवर "Draft – Pakistan’s PM Message on X" असे लिहिलेले होते. १२ वाजून ४७ मिनिटांनी ही पोस्ट एडिट करण्यात आली. ही ओळ नंतर घाईघाईत हटवण्यात आली, पण तोपर्यंत त्याचे स्क्रीनशॉट्स जगभरात व्हायरल झाले होते. 

'ड्राफ्ट' शब्दावरून संशयाची सुई

एखाद्या देशाचा पंतप्रधान स्वतःच्या पोस्टमध्ये पाकिस्तानच्या पंतप्रधानांसाठी मेसेज असा उल्लेख का करेल? हा प्रश्न विचारला जात आहे. सोशल मीडियावरील ही स्क्रिप्ट बाहेरून आली असल्याचा दावा केला जातोय. हा मेसेज पाकिस्तानच्या पंतप्रधान कार्यालयाने तयार केलेला नसून, तो अमेरिकेतील व्हाईट हाऊस किंवा ट्रम्प यांच्या टीमकडून पाठवण्यात आला होता. शरीफ यांनी तो केवळ कॉपी-पेस्ट केला आणि त्यातील सूचना हटवायला ते विसरले. ट्रम्प पाकिस्तानवर नियंत्रण मिळवत असून शहबाज शरीफ केवळ त्यांच्या इशाऱ्यावर काम करत आहेत, असाही आरोप आता होत आहेत.

इराण आणि अमेरिका यांच्यातील चर्चेसाठी आता इस्लामाबादची निवड करण्यात आली आहे. अशा वेळी पाकिस्तान स्वतःला मोठा मध्यस्थ म्हणून सादर करण्याचा प्रयत्न करत आहे. मात्र, या एका ट्वीटमुळे पाकिस्तानची प्रतिमा दुसऱ्याच्या इशाऱ्यावर चालणारा देश अशी झाली आहे. या पोस्टमध्ये ट्रम्प यांच्यासह स्टीव्ह विटकॉफ आणि मार्को रुबियो यांसारख्या अमेरिकन नेत्यांना टॅग करण्यात आले होते.

पुढे काय?

दरम्यान, येत्या दोन आठवड्यात इस्लामाबादमध्ये इराण आणि अमेरिका यांच्यात चर्चा होणार आहे. या चर्चेतून काही ठोस निष्पन्न होणार की ही केवळ ट्रम्प यांची रणनीती आहे, हे स्पष्ट होईल.