२४ तासांत ७ स्फोटांनी हादरले बलुचिस्तान! रेल्वे ट्रॅक बॉम्बने उडवला; पोलिस ठाण्यावर ग्रेनेड हल्ला

बलुचिस्तानची राजधानी क्वेट्टा आणि डेरा मुराद जमाली या ठिकाणी संशयित बंडखोरांनी एकापाठोपाठ एक ७ स्फोट घडवले. या स्फोटांचे प्रमुख लक्ष्य सुरक्षा दले आणि पायाभूत सुविधा होत्या.

बलुचिस्तान प्रांतामध्ये गेल्या २४ तासांत सात बॉम्बस्फोटांच्या घटनांनी दहशतवाद्यांचा देश पाकिस्तानला हादरवून सोडले आहे. येथील रेल्वे ट्रॅक, पोलीस चेकपोस्ट्स आणि एका खासगी कंपनीच्या साइटला लक्ष्य करण्यात आले असून, या हल्ल्यांमुळे राजधानी क्वेट्टामध्ये तणाव वाढला आहे.

बलुचिस्तानची राजधानी क्वेट्टा आणि डेरा मुराद जमाली या ठिकाणी संशयित बंडखोरांनी एकापाठोपाठ एक ७ स्फोट घडवले. या स्फोटांचे प्रमुख लक्ष्य सुरक्षा दले आणि पायाभूत सुविधा होत्या.

क्वेट्टाच्या बाहेरील लोहर करेजजवळ आयईडी वापरून मुख्य रेल्वे लाईन उडवण्यात आली. यामुळे क्वेट्टाला पाकिस्तानच्या इतर भागांशी जोडणारा रेल्वे वाहतूक मार्ग विस्कळीत झाला. क्वेट्टातील एका पोलीस चेकपोस्टवर हँड ग्रेनेड फेकण्यात आले. तसेच, दहशतवादविरोधी विभागाच्या वाहनाजवळ आयईडी स्फोट घडवून आणण्यात आला. रविवारी सकाळी मंजूर शहीद पोलीस स्टेशनवरही दुचाकीवरून आलेल्या हल्लेखोरांनी दोन हँड ग्रेनेड फेकले.

दोन सुरक्षा रक्षक जखमी
सरियाब रोडवर एका बांधकाम कंपनीच्या साइटवर हँड ग्रेनेड हल्ला करण्यात आला, ज्यात कंपनीच्या यंत्रसामग्रीचे नुकसान झाले आणि दोन सुरक्षा रक्षक जखमी झाले. सध्या तरी कोणत्याही बंडखोर गटाने या हल्ल्यांची जबाबदारी स्वीकारलेली नाही. मात्र, या घटनांमुळे बलुचिस्तानमधील सुरक्षा व्यवस्था पुन्हा एकदा धोक्यात आल्याचे दिसत आहे. पोलीस अधिकार्‍यांनी सर्व घटनांची तपासणी सुरू केली असून, सुरक्षा वाढवण्यात आली आहे.