परभणी जिल्ह्यातील गट-तटांचे वारे वाहतेय हिंगोलीतही

यावेळी परभणी जिल्ह्यात आ. सुरेश वरपूडकर व माजी आ. रामप्रसाद बोर्डीकर यांचे वेगवेगळे गट पडले आहेत. त्यामुळे हिंगोलीतही त्यानुसार गट पडत आहेत. दोन पॅनलमध्ये लढतीची चिन्हे असल्याने दोन्हींपैकी एका गटात संधीसाठी प्रयत्न होत आहेत. कळमनुरीतून सुरेश वडगावकर पुन्हा तयारी करीत असून त्यांनी काँग्रेस व शिवसेना या दोन्ही डगरीवर हात ठेवला. वरपूडकर गटाकडून ते जाण्याची शक्यता आहे. तर माजी खा. शिवाजी माने यामुळे सेनेवर नाराज झाले असून ते विरोधी गटाकडून जातील, अशी शक्यता आहे. हिंगोलीत आ. तान्हाजी मुटकुळे हे साहजिकच बोर्डीकर गटाकडून असून विरोधी गट दत्तराव कडतीकर यांना रिंगणात आणण्याच्या तयारीत आहे. सेनगावात माजी आ. साहेबराव पाटील यांना आव्हान देण्यासाठी राजेंद्र देशमुख हे तयारी करताना दिसत आहेत.

सर्वांत जास्त इच्छुक औंढ्यात आहेत. येथे विद्ममान बाबा नाईक यांना शह देण्यासाठी बोर्डीकर गटाकडून राजेश पाटील गोरेगावकर रिंगणात उतरण्याची शक्यता आहे. तर अपक्ष वेणूताई तातेराव आहेर व जि.प. उपाध्यक्ष मनीष आखरेही तयारीत आहेत. मात्र, आखरे इतर मागासमध्येही नशीब अजमावण्याची तयारी करीत आहेत. तर रूपाली पाटील पुन्हा महिलांमधून रिंगणात राहतील, असे दिसते. गोरेगावकर यांच्या कुटुंबातीलच तीन उमेदवार होण्याची शक्यता असून दोन वेगवेगळ्या गटात राहण्याची शक्यता आहे. वसमतमध्ये अंबादास भोसले यांना राष्ट्रवादीतूनच शह देण्याचा प्रयत्न चालल्याच्या वावड्या उठत होत्या. मात्र, आ. राजू नवघरे यांना यात फारसा रस दिसत नाही. एकंदर मध्यवर्ती बँकेमुळे काही पक्षांना अंतर्गत गटबाजीला सामोरे जावे लागण्याची शक्यता निर्माण झाली आहे.