कुरुंद्यात एकाच दिवशी दोन आत्महत्या

कुरुंदा : वसमत तालुक्यातील कुरुंदा येथे वेगवेगळ्या घटनांत दोन जणांनी आत्महत्या केल्याची घटना शुक्रवार, १२ फेब्रुवारी रोजी सकाळी घडली. एका विवाहित महिलेने दीड महिन्याच्या बाळाला घरी सोडून विहिरीत उडी घेऊन आत्महत्या केली आहे. तर दुसऱ्या घटनेत एका इसमाने गळफास घेऊन आत्महत्या केली. या दोन्ही घटना कुरुंदा येथे घडल्या आहेत.

येथील अनिता धोंडिबा खिल्लारे, वय २२ वर्षे या विवाहितेने विहिरीत उडी घेऊन आत्महत्या केल्याचे सकाळी ११ च्या सुमारास समोर आले. वसमत रस्त्यावरील वेअर हाऊससमोरील एका शेतात १२ फेब्रुवारी रोजी सकाळी या विवाहित महिलेने आत्महत्या केली. या महिलेचे २ वर्षांपूर्व लग्न झाले होते. मयत महिलेला दीड महिन्याचे बाळ आहे. आत्महत्या केली की अन्य कारण आहे, हे अद्याप स्पष्ट झाले नव्हते. घटनास्थळी कुरुंदा पोलीस ठाण्याचे सपोनि. सुनील गोपीनवार, फौजदार सविता बोधनकर, वाळके, आम्ले, दाबनवाड आदींनी भेट दिली आहे. सकाळी ११ वाजल्यापासून विहिरीतील त्या महिलेचे प्रेत बाहेर काढण्यासाठी प्रयत्न सुरू होते; परंतु विहिरीचा पाणी उपसा करूनही पातळी कमी होत नसल्याने रात्री ७ वाजेपर्यंत ते प्रेत बाहेर निघाले नव्हते. आत्महत्येमागचे कारणही स्पष्ट झाले नव्हते. उशिरापर्यंत विहिरीतून प्रेत बाहेर काढण्याची प्रक्रिया सुरू होती. दीड वर्षाच्या बाळाला सोडून या महिलेने आत्महत्या केल्याने हळहळ व्यक्त होत आहे. त्यामुळे एका प्रकारे त्या बाळाचे मातृत्व हरवले आहे.

कुरुंदा येथील अण्णाभाऊ साठेनगरमधील पिंटू महादू घोंगडे, वय ३८ वर्षे याने राहत्या घरी शुक्रवारी सकाळी १० वाजण्याच्या सुमारास गळाफास घेऊन आत्महत्या केली. याप्रकरणी अद्याप फिर्याद न दिल्याने या घटनेची नोंद झाली नव्हती.