दोन क्विंटल प्लास्टिक जप्त : आठ व्यापाऱ्यांना दंड

हिंगोली : येथील नगरपालिकेच्या वतीने शहरात शुक्रवारी प्लास्टिकजप्तीची मोहीम राबविण्यात आली. यावेळी शहरातील आठ व्यापाऱ्यांकडून तब्बल २ क्विंटल प्लास्टिक जप्त करण्यात आले असून, त्यांच्याकडून २६ हजार ५०० रुपयांचा दंड वसूल करण्यात आला आहे.

हिंगाेली शहरातील काही व्यापारी प्लास्टिकच्या पिशव्या वापरत असल्याची माहिती नगरपालिकेला मिळाली होती. त्यानुसार नगरपालिकेेचे डॉ. अजय कुरवाडे यांच्या पथकाने शहरातील व्यापाऱ्यांच्या दुकानांची तपासणी केली. यामध्ये शहरातील ८ व्यापाऱ्यांकडे प्लास्टिक आढळून आले. प्लास्टिक आढळलेल्या व्यापाऱ्यांवर दंडात्मक कारवाई करण्यात आली. तसेच त्यांच्यावर फौजदारी कारवाई करण्यात येणार असल्याची माहिती पथकाने दिली. कारवाई करण्यात आलेल्या व्यापाऱ्यांमध्ये के. जी. एन. किराणा दुकान (५ हजार दंड), ओम किराणा दुकान (५०० रुपये), भारत गारमेंट, मोहमद अशरद (५ हजार), जवाहर रामेश्वर मुंदडा किराणा दुकान (२ हजार), अमर कलेक्शन कापड दुकान (२ हजार), लाडली लेडीज वेअर (२ हजार), सुदर्शन नैनवाणी किराणा दुकान (५ हजार), सुनील नैनवाणी किराणा दुकान (५ हजार) यांचा समावेश आहे.

सर्व व्यापाऱ्यांनी प्लास्टिक बंदीच्या नियमांचे पालन करावे, अन्यथा नगरपालिकेकडून कारवाई करण्यात येईल, असा इशाराही नगरपालिकेने दिला आहे. पथकात मुख्याधिकारी डॉ. अजय कुरवाडे, उपमुख्याधिकारी उमेश हेंबाडे, सनोबर तसलिम, बाळू बांगर, पंडित मस्के, अमरसिंग ठाकूर यांच्यासह स्वच्छ सर्वेक्षण पथकातील कर्मचाऱ्यांचा समावेश होता.

फोटो नं. १३