भक्तीभाव व समर्पणाने निरंकारी संत समागमाची जय्यत पूर्वतयारी

हिंगोली : निरंकारी सद्गुरू माता सुदीक्षाजी महाराज यांच्या पावन छत्रछायेखाली महाराष्ट्राचा ५४ वा वार्षिक निरंकारी संत समागम दिनांक २६ ते २८ फेब्रुवारी रोजी व्हर्च्युअल रुपात आयोजित करण्यात येत आहे. कोरोनाचे संक्रमण अजूनही पूर्णपणे थांबलेले नाही, ही बाब लक्षात घेऊन भारत सरकारने ‘काेविड -१९’च्या संदर्भात जारी केलेल्या दिशा - निर्देशांना अनुसरून या समागमाचे आयोजन व्हर्च्युअल रुपात करण्यात आले आहे. मिशनच्या सेवादारांकडून मागील दीड महिन्यांपासून या संत समागमाची जय्यत पूर्वतयारी मुंबईतील चेंबूर येथील संत निरंकारी सत्संग भवन येथे केली जात आहे. सदगुरू माता सुदीक्षाजी महाराज यांच्या पावन सानिध्यात समागमात भाग घेणारे वक्ता, गीतकार, गायक, कवी, संगीतकार, वादक यांनी या भवनमध्ये येऊन आपली प्रस्तुती सादर केली आहे. या सर्वांचे व्हर्च्युअल रुपात प्रसारण करण्यासाठी त्यांचे रेकॉर्डिंग करण्यात आले आहे. या समागममध्ये महाराष्ट्रासह देश- विदेशातील वक्त्यांनी भाग घेतला आहे. या कार्यक्रमामध्ये कोरोनाच्या नियमांचे सर्व पालन करुन समागमातील सर्व सहभागी प्रतिनिधींची कोविड आरटीपीसीआर तपासणीही करण्यात आलेली आहे. संपूर्ण समागमाचे व्हर्च्युअल प्रसारण मिशनच्या वेबसाईटवर दिनांक २६ ते २८ फेब्रुवारी रोजी करण्यात येणार आहे.