हिंगोली - आपल्या मतदारसंघातील नागरिकांना रेमडिसीवीर इंजेक्शनचा साठा मिळावा, यासाठी आपली 90 लाखांची एफडी मोडणाऱ्या आमदारांची एक ऑडिओ क्लीप व्हायरल झाली आहे. त्यामध्ये, सरकारी 108 अॅम्ब्युलन्सची गाडी वेळेत हजन न झाल्याने त्यांनी संताप व्यक्त केला आहे. तसेच, संबंधित फोनवरील व्यक्तीला, 20 मिनिटांत गाडी हजर न झाल्यास पेट्रोल टाकून फुकून देईल, असेही ते या फोन संभाषणात म्हटल्याचे दिसून येते.
जिल्हा परिषद अध्यक्षांची प्रकृती बिघडल्याने त्यांना औरंगाबाद येथे नेण्यासाठी 108 नंबरवरील अॅम्ब्युलन्सला पाचारण करण्यात आले होते. मात्र, गाडी मिळण्यास दोन तास उशीर झाल्यामुळे हिंगोलीतीलशिवसेनाआमदाराचा संताप झाल्याचं पाहायला मिळाले. हिंगोलीतील कळमनुरी विधानसभा मतदारसंघातील शिवसेना आमदार संतोष बांगर (Hingoli Kalamnuri Shivsena MLA Santosh Bangar) यांची कथित ऑडिओ क्लीप व्हायरल झाली आहे. 20 मिनिटात गाडी पाठव, नाही तर पेट्रोल टाकून फुकून देईन, असा दमच बांगर यांनी भरल्याचं संबंधित ऑडिओ क्लीपमध्ये ऐकायला मिळतं. या कथित फोन संभाषणाची ऑडिओ क्लीप सोशल मीडियावर व्हायरल झाली आहे.
रेमडीसीवीरसाठी मोडली 90 लाखांची एफडी
दरम्यान, आमदार संतोष बांगर यांनी काही दिवसांपूर्वीच आपली 90 लाखांची एफडी मोडून रेमडीसीवीर इंजेक्शनची मागणी केली होती. आपल्या मतदारसंघातील नागरिकांचं जीवन वाचवण्याला प्राधान्य देण्याचंही त्यांनी म्हटलं होतं. तसेच, एका रुग्णाने रेमडीसीवीर इंजेक्शनसाठी आमदार बांगर यांना फोन केला होता. आपल्या आईची तब्येत खालावली असून ती सरकारी रुग्णालयात उपचार घेत आहे. डॉक्टरांनी रेमेडीसीवीर इंजेक्शनची मागणी केलीय, असे म्हणत रडत असलेल्या मुलाला धीर दिला. त्यानंतर, त्या रुग्णालयात 2 रेमडीसीवीर इंजेक्शनची सोयही त्यांनी करुन दिली होती. त्यामुळे, मतदारसंघात या आमदारांच्या संवेदनशीलतंच सध्या कौतुक होतंय.