संचारबंदीतही सहा हजार मजुरांना मिळाला रोजगार

हिंगोली : जिल्ह्यात कोरोनाच्या पार्श्वभूमीवर अत्यावश्यक सेवा वगळता इतर सेवा बंद ठेवण्याचे आदेश देण्यात आले आहेत. त्यामुळे अनेकांच्या हातचा रोजगार गेला आहे. मात्र, रोजगार हमी योजनेंतर्गंत संचारबंदी काळातही तब्बल ३ हजार ६४७ जॉबकार्ड धारकांच्या हाताला काम उपलब्ध करून दिले असून यातून ६ हजार १२२ मजुरांच्या चेहऱ्यावर हास्य फुलले आहे.

जिल्ह्यात कोरोना संसर्गजन्य आजाराने थैमान घातले आहे. मार्च महिन्यात तब्बल दोन वेळेस व आता पुन्हा ३० एप्रिलपर्यंत संचारबंदीचे आदेश आहेत. अत्यावश्यक सेवा वगळता इतर व्यवसाय ठप्प पडले आहेत. यात मजूर वर्गाला सर्वाधिक फटका बसला आहे. त्यामुळे त्यांच्या रोजगाराचा प्रश्न निर्माण झाला होता. कोरोनाचे नियम पाळून ग्रामपंचायत स्तरावर मजुरांना रोजगार कसा उपलब्ध होईल, याचे नियोजन करून जिल्हा प्रशासनाने महात्मा गांधी रोजगार हमी योजनेंतर्गंत मजुरांच्या हाताला कामे उपलब्ध करून देण्याचा निर्णय घेतला. त्यानुसार जिल्ह्यात रोपवाटीका, सिंचन विहीर, बांधावरील वृक्ष लागवड, शेततळे, विहीर पुनर्रभरण, शोष खड्डा, मातीनाला बांध, घरकुल आदींच्या माध्यमातून हाताला कामे उपलब्ध करून दिली आहेत. जिल्ह्यात चालू वर्षात एप्रिल महिन्यात ३ हजार ६४७ जॉब कार्डधारकांना कामे देण्यात आली असून यातून ६ हजार १२२ मजुरांच्या हाताला रोजगार मिळाला आहे.

१८ हजार मजुरांनी केली कामाची मागणी

राज्यभरात मध्यंतरी कोरोनाची रुग्ण संख्या कमी झाली होती. त्यामुळे जिल्ह्यातील अनेक मजूर कामानिमित्त मोठ्या शहरात स्थलांतरित झाले होते. आता संचारबंदी लागल्याने मजूर पुन्हा गावाकडे परत येत आहेत. त्यामुळे गावात हाताला काम मिळावे यासाठी मोठ्या प्रमाणावर कामाची मागणी वाढली आहे. जिल्ह्यात एकूण १ लाख ७४ हजार ३१२ रोहयो जॉब कार्डची नोंदणी झालेली आहे. त्यापैकी १० हजार ६४१ जॉबकार्डवरील १८ हजार ३६३ मजुरांनी कामाची मागणी प्रशासनाकडे केली होती. त्यानुसार प्रशासनाने १० हजार ५९५ जॉब कार्डवरील १८ हजार २८६ मजुरांना रोजगार देऊ केला आहे. मात्र, सध्या जिल्ह्यात ६ हजार १२२ मजुरांच्या हाताला कामे मिळाले आहे.

एप्रिल महिन्यात पुरविलेला तालुकानिहाय रोजगार

तालुका जॉबकार्डधारक संख्या मजूर संख्या

कळमनुरी ८१२ १३१४

औंढा नागनाथ ८९ १३४

वसमत १६९६ २७२८

हिंगोली १००६ १८८४

सेनगाव ४४ ६२

एकूण ३६४७ ६१२२