‘माझे गाव, सुंदर गाव’ उपक्रमाला जिल्ह्यात प्रतिसाद

हिंगोली : ‘माझे गाव, सुंदर गाव’ हा उपक्रम जिल्ह्यातील ५६३ ग्रामपंचायतींमध्ये राबविला जात असून, अधिकाऱ्यांसह सरपंच, उपसरपंचांसह गावकरीही या उपक्रमात सहभाग घेत असल्याची माहिती सहायक गटविकास अधिकारी जी.पी. बोथीकर यांनी दिली.

‘माझे गाव, सुंदर गाव’ हा उपक्रम २२ जानेवारी ते २० मार्चदरम्यान राबविण्यात येत आहे. या उपक्रमांतर्गत जिल्हा परिषद, पंचायत समितीस्तरावरून हा उपक्रम राबविला जात आहे. या उपक्रमाला चांगला प्रतिसाद मिळत असून, गावकरीही यात हिरीरीने सहभाग घेऊन गाव कसे सुंदर करता येईल, यासाठी प्रयत्न करताना दिसून येत आहेत. या उपक्रमातून तालुकापातळीवर प्रथम, द्वितीय व तृतीय याप्रमाणे ग्रामपंचायतींची निवड कशी करता येईल, यासाठीचा अहवाल विभागीय आयुक्त कार्यालयास कळवावा, असेही उपायुक्त सुरेश बेथमुथा यांनी एका पत्रकान्वये कळविले आहे.

‘माझे गाव, सुंदर गाव’ या उपक्रमांतर्गत ग्रामीण भागाची संपूर्ण स्वच्छता करणे, सर्व उकिरडे गावाबाहेर काढणे, जनावरांचे गोठे स्वच्छ व आकर्षक करणे, रस्त्यावर जनावरे न बांधणे, गावातील सर्व कचरा घंटागाडीने जमा करून त्यावर प्रक्रिया करणे, कंपोस्ट खत तयार करणे, सर्व घरांमध्ये ओला, सुका कचरा विलगीकरण करून त्यावर प्रक्रिया करणे व प्रत्येक घरामध्ये दोन वेगळ्या ओल्या व सुक्या कचऱ्यासाठी स्वतंत्र पेट्या ठेवणे, गावातील सर्व शौचालये वापरात आणून, रस्त्यावर व उघड्यावर शौचास जाणे बंद करावे, गॅस पाइपच्या झडपेवर जाळी बसविणे, सांडपाणी गावाच्या बाहेर काढणे, शोष खड्ड्यांचा वापर शंभर टक्के करणे, गावातील पाणी उघड्यावर येऊ न देणे, या उपक्रमांतर्गत सर्वांना सूचना दिल्या असून, सर्व जण यासाठी पुढाकार घेत आहेत.

बॉक्स

‘माझे गाव, सुंदर गाव’ या उपक्रमाचे मूल्यांकन २० मार्चनंतर केले जाणार आहे. २२ जानेवारीपासून हा उपक्रम सुरू झाला आहे. आजमितीस मुख्य कार्यकारी अधिकारी आर.बी. शर्मा, उपमुख्य कार्यकारी अधिकारी धनवंतकुमार माळी, उपमुख्य कार्यकारी अधिकारी डॉ. मिलिंद पोहरे व पाचही तालुक्यांतील सर्व गटविकास अधिकारी, सर्व सहायक गटविकास, सरपंच, सर्व अंगणवाडीताई, सर्व आशा वर्कर, सर्व मदतनीस, उपसरपंच, ग्रामसेवक, गावकरी हे स्वच्छतेसाठी प्रयत्न करीत आहेत.

फोटो नं. १