कळमनुरी(हिंगोली): हिंगोली- नांदेड मुख्य रस्त्यावर सेलसुरा शिवारामध्ये कारने दुचाकीच्या धडकेत दुचाकीस्वार पोलीस जमादाराचा जागीच मृत्यू झाला. सुरेश बांगर असे मृत पोलीस कर्मचाऱ्याचे नाव आहे. हा अपघात आज दुपारी अडीच ते तीन वाजेच्या दरम्यान झाला.
सुरेश बांगर हे कळमनुरी येथील पोलीस ठाण्यात तालुका विशेष शाखेत कार्यरत होते. ते आज दुपारी हिंगोलीवरून मोटरसायकलवरून ( एम.एच. 38 एस -4244) कळमनुरी येथे मिरवणूक बंदोबस्तासाठी येत होते. हिंगोली- नांदेड या मुख्य रस्त्यावर सेलसुरा येथे आल्यानंतर त्यांच्या मोटर सायकलला कारने ( क्रमांक एम.एच.02 बीआर 4639) जोरदार धडक दिली. यात सुरेश बांगर (57 ) गंभीर जखमी झाले.
माहिती मिळताच पोलीस निरीक्षक वैजनाथ मुंडे, गजानन होळकर, शिवाजी देमगुंडे, प्रशांत शिंदे, संजय राठोड आदींनी बांगर यांना हिंगोली जिल्हा सामान्य रुग्णालयात दाखल केले. तेथे तपासून डॉक्टरांनी त्यांना मृत घोषित केले. त्यांच्या पश्चात आई, पत्नी व दोन मुले असा परिवार आहे.