वसमत : गुंठेवारी रजिस्ट्री करण्यासाठी तहसीलदारांची खोटी स्वाक्षरी व राजमुद्रा असलेला बनावट शिक्का वापरल्याप्रकरणी वसमत शहर पोलिसांत फसवणुकीचा गुन्हा नोंदविण्यात आला आहे. तहसीलदारांच्या आदेशानंतर तलाठ्याने याप्रकरणी पोलिसांत तक्रार दिली. या प्रकाराने वसमत येथे ग्रामपंचायत एन.ए. हा बनावट ले-आऊट व बनावट प्रमाणपत्रे तयार करून प्लॉटची खरेदी - विक्री करणाऱ्यांचे माेठे रॅकेट उघड होण्याची शक्यता आहे.
वसमत शहराच्या हद्दीबाहेर आसेगाव-परभणी रस्त्यावर असलेल्या सर्वे नंबरमध्ये बनावट एन.ए. ले-आऊट तयार करून प्लॉट विक्रीचा सपाटा सुरू आहे. ग्रामपंचायतीने नमुना नंबर आठ दिल्याने व दुय्यम निबंधक कायार्लयात रजिस्ट्री करुन देणाऱ्यांची साखळी असल्याने हा धंदा जोरात सुरू आहे. नांदेड, परभणी रस्त्यावरही असाच प्रकार सुरू आहे. बनावट प्रमाणपत्राद्वारे गुंठेवारी रजिस्ट्री होत असल्याच्या तक्रारी वाढल्या असताना खुद्द तहसीलदारांचीच बनावट स्वाक्षरी व तहसीलचा शिक्का असलेले प्रमाणपत्र सादर करून प्लॉटची रजिस्ट्री करण्याचा प्रकार समोर आला आहे.
तहसीलदार अरविंद बोलंगे यांनी या प्रकरणात गांभीर्याने लक्ष घातले व गुन्हा नोंदविण्याचे आदेश दिले. तलाठी माधव भुसावळे यांनी शहर पोलिसांत तक्रार दिली की, दुय्यम निबंधकाच्या नावाने बनावट परवानगीपत्र तयार करून त्यावर तहसीलदार वसमत यांची स्वाक्षरी करून खरेदीखत दस्त नोंदणी करून दिली. राजमुद्रा असलेला तहसील कार्यालयाचा शिक्का तयार करुन त्याचा गैरवापर केला असल्याचे नमूद आहे. या तक्रारीवरुन संजय दशरथे, भगवान दशरथे, रामराव दशरथे (सर्व रा. परळी ता. वसमत) यांच्या विरोधात फसवणुकीचा गुन्हा नोंदविण्यात आला आहे.
खरेदी - विक्री करणाऱ्यांविरोधात गुन्हा नोंदविण्यात आला असला तरी या शेतकऱ्यांना रजिस्ट्री करून देण्यासाठी हे बनावट प्रमाणपत्र कोणी दिले, तहसील प्रमाणपत्राची पडताळणी न करता दस्तनोंदणी कशी केली, याची चर्चा शहरात होत आहे.