ना कॉल, ना ओटीपी, तरी बँकेतून पैसे गायब ! फ्री गेम, अनोळखी ॲप परमीशन टाळा !!

हिंगोली : स्मार्टफोनमुळे सर्व माहिती एका क्षणात मिळत असली तरी यातून फसवणुकीचे प्रकार वाढले आहेत. कोणी कॉल केला नाही, ओटीपीही मागितला नाही तरी बँक खात्यातून पैसे गायब होत असल्याचे समोर आले आहे. जिल्ह्यात सध्या तरी अशी एकही फसवणुकीची घटना दाखल नाही. मात्र, अनेक ॲपमध्ये ऑटो रिड ओटीपीची परवानगी दिली जात असल्याने यातून फसवणूक होत आहे.

स्मार्टफोनमुळे सर्व व्यवहार ऑनलाईन झाले आहेत. पैशांची देवाणघेवाण करण्यासाठी तसेच लहान मुलांना खेळण्यासाठी विविध ॲप डाऊनलोड केले जात आहेत. फेसबुक, इंन्स्टाग्राम, ट्विटरमुळे काही माहिती क्षणात मिळत असली तरी यातून चुकीची माहितीही पसरवली जात आहे तसेच फसवणुकीचे प्रकारही वाढले आहेत. फेसबुकवरील प्रोफाईलवरून फोटो वापरून बनावट अकाैंट तयार करून तसेच ओटीपी मागून पैसे परस्पर उचलून घेतल्याचे प्रकार घडले आहेत. आता तर कोणताही कॉल न करता तसेच ओटीपी न मागता बँक खात्यातून परस्पर पैसे गायब होत असल्याचे प्रकार घडत आहेत. हिंगोली जिल्ह्यात आतापर्यंत अशी एकही घटना घडल्याचे समोर आले नसले तरी फ्री गेम, अनोळखी ॲप डाऊनलोड करण्याच्या नादात ऑटो रिड ओटीपीची परवानगी दिली जात आहे. त्यातूनच आपली फसवणूक होत आहे.

पैसे परत मिळण्याची शक्यता कमीच

-आपल्या बँक खात्यातून एकदा ऑनलाईन माध्यमातून फसवणूक झाली तर सहसा हे पैसे परत मिळण्याची शक्यता कमीच असते.

- तरीही काही मिनिटांत सायबर सेलला अशा फसवणुकीची माहिती दिल्यास सायबर सेल पैसे मिळवून देण्यासाठी प्रयत्न करतो. मात्र, तरीही शंभर टक्के पैसे परत मिळतीलच, असे सांगता येत नाही.

- त्यामुळे अनोळखी व्यक्तीला ओटीपी न सांगणे, आपली वैयक्तिक माहिती न देणे हेच आपल्याचा फसवणुकीपासून वाचवू शकते.

अनोळखी ॲप नकोच

मोबाईलमध्ये विविध ॲप डाऊनलोड करण्याची स्पर्धाच लागली आहे. त्यात काही खात्रीशीर ॲप असले तरी सायबर चोरटे विविध क्लृप्त्या वापरून मोबाईलधारकांना गंडा घालण्यात तरबेज झालेत. फ्री ॲपच्या माध्यमातून अमिष दाखविले जाते. या अमिषाला मोबाईलधारक बळी पडतो. ॲप डाऊनलोड करताना ऑटो रिड ओटीपीची परवानगीही दिली जाते. त्यामुळे आपल्या खात्यातून आपल्याला कोणतीही कल्पना नसताना पैसे कमी होतात.

ऑनलाईन फसवणुकीचे गुन्हे२०१९-००

२०२० - ००

२०२१ -००

मोबाईलधारक बाळगताहेत सावधगिरी

जिल्ह्यात ऑनलाईन फसवणुकीची एकही घटना दाखल नसली तरी २०२१ मध्ये इतर फसवणुकीच्या तीन घटना आहेत तसेच २०२० मध्ये १६ प्रकरणांची नोंद सायबर सेलकडे आहे. ऑनलाईन फसवणुकीची एकही घटना नसल्याने जिल्ह्यातील मोबाईलधारक सावधानता बाळगत असल्याचे दिसून येत आहे.

मोबाईलमध्ये कोणतेही ॲप डाऊनलोड करण्यापूर्वी आपली फसवणूक होणार नाही ना याची काळजी घ्यावी तसेच अनोळखी ॲपला परमिशन देण्याचे टाळण्यास होणारी फसवणूक टाळता येईल.

- उदय खंडेराय, पोलीस निरीक्षक, स्थानिक गुन्हे शाखा