रुग्णालयांत जागा नाही; कोविड केअर सेंटर मात्र रिकामे

हिंगोली जिल्ह्यात ऑक्सिजनची समस्या असून खासगी रुग्णालयांनाही ऑक्सिजन मिळत नसल्याने अडचणी येत आहेत, तर शासकीय रुग्णालयांसाठी यंत्रणेकडून धावपळ केली जात असल्याने कसातरी नियमित पुरवठा सुरू आहे. अनेकांनी शासकीयमध्ये नाहक ऑक्सिजन बेड अडविल्याचे प्रकारही घडत आहेत. या रुग्णांना इतरत्र हलविताना रुग्णालय प्रशासनाची दमछाक होत आहे. ऑक्सिजन लागलेल्या रुग्णांनी एक ते दोन दिवसांनी सामान्यपणे श्वास घेण्याचा प्रयत्न करून ऑक्सिजनची नोड बंद करणे गरजेचे असताना तो तसाच चालू ठेवून अपव्यय करण्याचे प्रकार घडत आहेत. याबाबत रुग्णांनी गंभीर होणे गरजेचे असून दुसऱ्याचा हक्क आपण हिरावत असल्याची जाणीव ठेवणे भाग आहे.

कोविडग्रस्तांवर उपचार करणारी रुग्णालये

८

एकूण बेड ८०० भरलेले बेड ८००

ऑक्सिजन बेड ५७० भरलेले बेड ६६३

कोविड सेंटर : १४

एकूण बेड १८३४ भरलेले बेड ६५८

रुग्णांची बेड मिळविण्यासाठी वणवण

सध्या सर्वच शासकीय रुग्णालयांत बेड मिळत नाहीत. खासगीतही बेड एकेकच शिल्लक असल्याने मोठी अडचण आहे. जेथे बेड रिकामा झाला तेथे रुग्ण हलविण्याची कवायत करावी लागत आहे.

कोविड केअर सेंटरमध्ये ७० टक्के बेड रिकामे

हिंगोली जिल्ह्यात कोविड सेंटरमध्ये शासकीयचेच १८३४ पैकी ११७६ बेड रिकामे आहेत. जवळपास साठ ते सत्तर टक्के बेड रिकामे आहेत. त्यामुळे सौम्य लक्षणे असलेल्या रुग्णांसाठी कोणतीच अडचण नाही. त्यामुळे रुग्णांनी वेळेत तपासणी करून घेतली तर त्यांना काहीच अडचण जात नाही. मात्र, अनेकजण त्यास विलंब करीत असल्याचे दिसते.

रुग्णांना सौम्य लक्षणे, तरीही रुग्णालयांत

अनेक रुग्णांना सौम्य लक्षणे आहेत. मात्र, तरीही त्यांना रुग्णालयांत जाण्याचा सोस आहे. असे रुग्ण आधी शासकीयमध्ये प्रयत्न करून नंतर खासगीचा रस्ता धरत आहेत, तर काहीजण लोकप्रतिनिधींचा दबाव आणून रुग्णालयातील बेड अडवून धरत आहेत. यावर जरब बसणे गरजेचे आहे. जिल्हाधिकाऱ्यांनी अशा काहींना केअर सेंटरचा रस्ता दाखविला होता.

जिल्ह्यात सध्या ऑक्सिजनचे बेड शिल्लक नसले तरीही जेवढे रिकामे होत आहेत, तेवढे नवे रुग्ण येत आहेत. एक-दोन दिवसांत वसमतला नवे १०० ऑक्सिजन बेड उपलब्ध होतील. आणखीही यंत्रणा निर्माण होईल. चिंतेचे कारण नाही.

-रुचेश जयवंशी, जिल्हाधिकारी.