तूर कापणी अंतिम टप्प्यात

फाळेगाव फाट्यापर्यंतचा रस्ता उखडला

फाळेगाव : हिंगोली तालुक्यातील फाळेगाव ते फाट्यापर्यंतचा रस्ता खड्डेमय झाला आहे. गावापासून ते फाट्यापर्यंत असलेला अडीच किमीचा रस्ता अर्ध्या अंतरापर्यंत चांगला असून, उर्वरित मात्र पूर्णपणे खराब झालेला आहे. यामुळे वाहनधारकांना दररोज या रस्त्यांवरून ये-जा करणे अवघड झाले आहे.

पाण्यासाठी गावकऱ्यांची भटकंती

बासंबा : हिंगोली तालुक्यातील बासंबा गावातील काही भागातील विहीर व बोअर आटले आहेत. यामुळे या भागातील नागरिकांना पाण्यासाठी गावासह शेतशिवारात भटकंती करावी लागत आहे. दिवसेंदिवस गावातील अनेक बोअर आटू लागले आहेत. यामुळे अनेक गावकरी पाण्यासाठी भटकत असल्याचे दिसत आहेत.

पथदिवे दुरुस्तीची मागणी

बासंबा : हिंगोली तालुक्यातील बासंबा गावातील पथदिवे बंद आहेत. मागील सहा ते आठ महिन्यांपासून गावातील पथदिवे तांत्रिक बिघाडामुळे बंद पडले आहेत. यासाठी लवकरात लवकर गावातील पथदिवे दुरुस्त करण्याची मागणी गावकरी करीत आहेत. रात्रीच्या वेळी संपूर्ण गावात अंधारमय वातावरण होत आहे.

बससेवा सुरू करण्याची मागणी

पांगरा शिंदे : कळमनुरी तालुक्यातील पांगरा शिंदे परिसरातील बससेवा कोरोना महामारीमुळे बंद करण्यात आली होती. जिल्ह्यातील सर्व कारभार सुरू झाले असून, कळमनुरी येथील आगारातून असणारी ही बससेवा सुरू करण्यात यावी, अशी मागणी पांगरा शिंदे, पोतरा, वाई व इतर परिसरातील गावांतून होत आहे.

वीजपुरवठा वारंवार खंडित

साखरा : सेनगाव तालुक्यातील साखरा गावातील वीजपुरवठा वारंवार खंडित होत आहे. गावातील वीज खंडित होत असल्याने गावातील दैनंदिन कामकाजासह शेतीच्या कामकाजावरही परिणाम पडत आहे. यासाठी गावातील वीजपुरवठा सुरळीत करण्यात यावा, अशी मागणी गावकऱ्यांतून होत आहे.

मोकाट कुत्र्यांचा उपद्रव वाढला

हिंगोली : शहरातील रिसाला बाजार, आदर्श कॉलेज रस्ता आणि जय भारत शाळेसमोरील रस्त्यांवर कुत्र्यांचा उपद्रव वाढला आहे. अनेकदा रात्रीच्या वेळी या मार्गावरून ये-जा करणाऱ्या वाहनधारकांच्या पाठीमागे हे कुत्रे लागत असल्याचेही घडत आहे.