आखाडा बाळापुर ( हिंगोली ) : येलकी येथील सशस्त्र सीमा बलाच्या कॅम्पमध्ये कार्यरत असलेल्या एका जवानाचा अपघातात छातीत गोळी लागून मृत्यू झाल्याची घटना आज पहाटे घडली. त्यांच्या फोर्सच्या डॉक्टरला आणण्यासाठी नांदेडला जात असताना खड्ड्यांमध्ये गाडी आदळल्याने रायफलमधून अचानक गोळी झाडल्या गेली, ती थेट छातीत लागल्याने जवान पप्पाला भानूप्रसाद यांचा मृत्यू झाला.
या प्रकरणी पोलिस सूत्रांनी दिलेल्या माहितीनुसार हिंगोली जिल्ह्यातील येलकी येथील सशस्त्र सीमा बलाच्या कॅम्पमध्ये कार्यरत असलेले जवान कॉन्स्टेबल पप्पाला भानूप्रसाद ( वय 35 वर्षे ,रा. आंध्र प्रदेश ) हे कर्तव्यावर होते. पहाटे साडेतीन ते चार वाजण्याच्या सुमारास ते दलाच्या गाडीमध्ये हैदराबादवरून नांदेडला आलेल्या डॉक्टरला घेण्यासाठी जात होते.
दरम्यान, हिंगोली ते नांदेड या रस्त्याचे काम सुरू असल्याने मोठे खड्डे पडले आहेत. डोंगरकडापासून तीन किलोमीटरवर गाडी आली असता रस्त्यावरील एका खड्ड्यात गाडी आदळली. यावेळी जवान पप्पाला भानुप्रसाद यांच्या रायफलमधून अचानक गोळी सुटली. ती थेट जवान छातीत घुसल्याने जवान पप्पाला गंभीर जखमी झाले. त्यांना तत्काळ नांदेडच्या शासकीय रुग्णालयात दाखल करण्यात आले. येथे डॉक्टरांनी तपासून त्यांना मृत घोषित केले.
माहिती मिळताच ठाणेदार पंढरीनाथ बोधनापोड , पोलीस उपनिरीक्षक बालाजी पुंड यांनी घटनास्थळी धाव घेतली. सशस्त्र सीमा बलाचे कमांडंट तिवारी यांच्याशी संपर्क साधण्याचा प्रयत्न केला असता संपर्क होऊ शकला नाही. नांदेड-हिंगोली रस्त्यावरील खड्ड्यांमुळे हा अपघात घडला असून खड्ड्यांमुळे जवानाचा जीव गेल्याची चर्चा परिसरात सुरू आहे.