कोरोनाचे नव्याने चार रुग्ण आढळले

जिल्हाभरात आरोग्य विभागाच्या वतीने वसमत, कळमनुरी, सेनगाव, औंढा नागनाथ परिसरातील ३४ जणांची रॅपिड ॲंटिजन टेस्ट केली असता यात एकही कोरोनाचा रुग्ण आढळून आला नाही, मात्र हिंगोली व औंढा परिसरातील संशयिताची तपासणी केली असता हिंगोली परिसरात १ तर औंढा परिसरात ३ कोरोनाचे रुग्ण आढळून आले. तसेच यावेळी हिंगोली येथील सामान्य रुग्णालयातील २, कळमनुरी येथील कोरोना केअर सेंटर ४, लिंबाळा येथील कोरोना केअर सेंटरमधील ४ असे एकूण १० रुग्ण बरे झाल्याने त्यांना रुग्णालयातून घरी सोडण्यात आले आहे. आतापर्यंत कोरोनाचे ३ हजार ७५० रुग्ण आढळून आले असून, त्यापैकी ३ हजार ६३५ रुग्णांना घरी सोडण्यात आले आहे. आतापर्यंत एकूण ५६ रुग्णांचा मृत्यू झाल्याचे आरोग्य विभागाने सांगितले. हिंगोली येथील जिल्हा सामान्य रुग्णालयातील २ रुग्णांची प्रकृती गंभीर असल्याने त्यांना ऑक्सिजनवर ठेवण्यात आले आहे.