आडगाव (रंजे) (जि. हिंगोली): परभणी ते हिंगोली रस्त्यावर आडगाव (रंजे) येथे झालेल्या तीन वाहनांच्या विचित्र अपघातात सात जण जखमी झाले. ही घटना ९ मे रोजी दुपारी बारा वाजेच्या सुमारास घडली.
मंगळवारी दुपारी बारा वाजेच्या सुमारास बसथांबा परिसरात एक कार (एमएच-३८-७३५५), ऑटो (एमएच-२२-एपी-१३९५) व दुचाकी (एमएच-२२ एएच-८४०३) यांच्यात विचित्र अपघात झाला. या अपघातात सात जण जखमी झाले आहेत. परभणी ते हिंगोली रस्त्यावरील आडगाव (रंजे) गावाजवळ एक कारने ऑटोला समोरासमोर टक्कर दिली. याचवेळी अपघातातील ऑटोवर पाठीमागून येणारी दुचाकी आदळली.
या विचित्र अपघातात ओंकार नवनाथ भरोसे (वय दहा), नवनाथ भरोसे, कुंता भरोसे ( सर्व रा. असोला ता. परभणी), राजू शहाणे, शिवम गिरी, चांदू भंगे तसेच दुचाकीवरील हनुमान लगोटे (रा. लगोटगल्ली, परभणी) हे जखमी झाले आहेत. तर ओंकार नवनाथ भरोसे हा गंभीर जखमी झाला आहे.सर्व जखमींना अधिक उपचारासाठी परभणी येथे पाठविण्यात आले आहे. घटनास्थळी हट्टा येथील सहायक पोलिस निरीक्षक गजानन बोराटे, जमादार ताम्रचंद कासले, महेश अवचार यांच्यासह ग्रामस्थ पोहोचले होते.