पोस्टाच्या परीक्षेला निघालेल्या युवकाचा ट्रालीला धडकून अपघाती मृत्यू

कौठा : उज्ज्वल भविष्याचे स्वप्न रंगवत पोस्ट विभागाच्या परीक्षा देण्यासाठी निघालेल्या दोन तरुणांची नवी दुचाकी उभ्या ट्रक्टर ट्रालीला धडकून यातील एका तरुणांचा जागीच मृत्यू, तर एक जखमी झाल्याची घटना वसमत तालुक्यातील कौठा पाटीवर २३ जानेवारी राेजी सकाळी ४ वाजेच्या दरम्यान घडली. घटनास्थळी आलेल्या मयताच्या आई व नातेवाईक यांचा आक्रोश पाहून उपस्थितांच्याही डोळ्यात अश्रू आले होते.

डिग्रस कऱ्हाळे ता.हिंगोली येथील शुभम गोविंद पाईकराव व आणखी एक जण कुऱ्हे (पूर्ण नाव समजू शकले नाही) हे नांदेड येथे होणाऱ्या भारतीय डाक विभाग पोस्टाच्या परीक्षा देण्यासाठी भल्या पहाटे हिंगोली-नांदेड मार्गे नांदेडकडे जात होते. वसमत तालुक्यातील कौठा पाटीवर ऊस वाहतूक करणारे ट्रॅक्टर ट्राली पंक्चर झाल्याने ट्राली उभी होती. २३ जानेवारी रोजी सकाळी ४ ते ४:३०च्या दरम्यान हिंगोलीकडून येणाऱ्या या दोघांना उभ्या ट्रालीचा अंदाज न आल्याने पाठीमागून धडक दिली. यात शुभम पाईकराव यांचा जागीच मृत्यू झाला, तर सोबतच्याला गंभीर इजा झाल्याने त्याला घटनास्थळी असलेल्यांना नांदेड येथे उपचारासाठी हलविले आहे.

अपघाताची माहिती डिग्रस कऱ्हाळे येथे कळताच शुभमची आई, वडील, भाऊ व इतर नातेवाईक आले, तेव्हा मृतदेह उचलण्यात येत होता, ते पाहून नातेवाइकांनी एकच हंबरडा फोडला. आईचा आक्रोश पाहून घटनास्थळी जमलेल्या लोकांनाही अश्रू येत होते. अपघातस्थळी वसमत ग्रामीण पोलीस ठाण्याचे सपोनि विलास चवळी यांच्यासह नरवडे, चव्हाण आदींनी भेट देऊन मदतकार्य केले.

फाेटाे २३ नं.एचएनएलपी व ०१