प्रत्येक शुभकार्यात, तसंच प्रत्येक चांगल्या प्रसंगी गोड खाण्याची आणि भरवण्याची पद्धत आहे. त्यामुळे वेगवेगळ्या प्रकारच्या मिठाया, केक, चॉकलेट्स, कुकीज वगैरे अगदी प्रत्येक घरात कायमच उपलब्ध असतात, असं म्हणायला हरकत नाही. हे गोड पदार्थ पाहिल्यानंतर बहुतांश जणांच्या तोंडाला पाणी सुटतं. अनेकांच्या बाबतीत तर अशी परिस्थिती असते, की ज्यांना गोड (Sweets) खाल्ल्याशिवाय राहवतच नाही. दर काही तासांनी ते गोड खाण्यासाठी काही ना काही पर्याय शोधत असतात.
त्यामुळे साहजिकच त्यांच्या शरीरात गोड पदार्थ आवश्यकतेपेक्षा जास्त प्रमाणात जातात. गोड पदार्थ पाहून तोंडाला पाणी सुटण्याच्या या प्रक्रियेला शुगर क्रॅव्हिंग असं म्हटलं जातं. 'हेल्थलाइन'च्या म्हणण्यानुसार, शुगर क्रॅव्हिंग (Sugar Craving) ही अगदी सहज पाहायला मिळणारी समस्या आहे आणि ती जास्तकरून महिलांमध्ये पाहायला मिळते. एका अभ्यासातून असं लक्षात आलं आहे, की ६८ टक्के पुरुष आणि ९७ टक्के महिलांमध्ये शुगर क्रॅव्हिंगची समस्या आढळते.
'डाएटरी गाइडलाइन ऑफ अमेरिकन्स'च्या शिफारशीनुसार, आपल्या रोजच्या कॅलरी इनटेकमध्ये म्हणजेच जास्तीत जास्त १० टक्के भागच शुगरचा असला पाहिजे. याचाच अर्थ असा, की आपण रोज जेवढ्या कॅलरीज आहाराच्या रूपाने शरीरात घेतो, त्यापैकी केवळ १० टक्के कॅलरीज साखरेच्या रूपात असल्या पाहिजेत. उदाहरणार्थ, समजा एखादी व्यक्ती दररोज २००० कॅलरीज घेत असेल, तर त्या व्यक्तीच्या शरीरात दिवसभरात सर्व स्रोतांतून १२ चमच्यांपेक्षा जास्त साखर जाणं त्या व्यक्तीच्या आरोग्यासाठी धोकादायक (Simple Ways To Stop Sugar Craving) ठरू शकतं.
शुगर क्रॅव्हिंगमुळे (Sugar Craving) काय नुकसान होऊ शकतं?
-शरीरात डिहायड्रेशन अर्थात पाण्याचं प्रमाण कमी होऊ शकतं.
- हॉर्मोन्समध्ये बदल घडू शकतो.
- तणाव वाढू शकतो.
- पोषण कमी होऊ शकतं.
- बॅड कोलेस्टेरॉल वाढू शकतं.
- हृदयविकार जडू शकतात.
- लठ्ठपणा येऊ शकतो.
शुगर क्रॅव्हिंग असलेल्यांनी काय खावं?
- बेरीज (Berries) : गोड खाण्याची इच्छा झाली, तर वेगवेगळ्या प्रकारच्या बेरीज खाव्यात. त्यासाठी त्या बेरीज घरी आणून ठेवणं आवश्यक आहे. बेरीज खाल्ल्यामुळे शरीराला अँटीऑक्सिडंट्स, व्हिटॅमिन्स, मिनरल्स आदी पोषणमूल्यं मिळतील आणि गोड खाल्ल्याचं समाधानही मिळेल.
- डार्क चॉकलेट (Dark Chocolate) : केक, चॉकलेट, कुकीज वगैरे खाणं आवडत असेल, तर त्याऐवजी डार्क चॉकलेटचं सेवन करावं. संशोधनात असं आढळून आलं आहे, की त्यात अँटीऑक्सिडंट्स आणि अँटी इन्फ्लेमेटरी गुणधर्म असतात. त्यांचा आरोग्याला फायदा होतो.
- चिया सीड्स (Chia Seeds) : चिया सीड्समध्ये ओमेगा थ्री फॅटी अॅसिड्स, फायबर्स आदी आवश्यक घटक मोठ्या प्रमाणावर असतात. चिया सीड्सच्या सेवनामुळे शुगर क्रॅव्हिंग कमी होण्यासही मदत होते. टीव्ही पाहताना किंवा काम करताना बिस्किट्स, केक खाण्याऐवजी रोस्टेड चिया सीड्स खाऊ शकता.
- खजूर (Dates) : खजूर भरपूर पौष्टिक असतात. त्यात तंतुमय पदार्थ, पोटॅशियम, लोह आदी घटक असतात. गोड खाण्याची इच्छा झाली, तर खजूर जरूर खावेत.
- पिस्ता (Pista) : पिस्त्यात हाय प्रोटीन्स, तंतुमय पदार्थ, हेल्दी फॅट्स असतात. त्यांची चांगल्या आरोग्यासाठी आवश्यकता असते. त्यामुळे शुगर क्रॅव्हिंग होईल, त्या वेळी पिस्ता खाऊ शकता.
- ग्रीक योगर्ट (Greek Yogurt) : गोड खाण्याऐवजी ग्रीक योगर्ट खावं. ते चवीला टेस्टी आणि गोड असतं; मात्र ते शरीरासाठी लाभदायक असतं.
- चीज (Cheese) : चीजमध्ये मोठ्या प्रमाणात प्रोटीन्स, गुड फॅट्स, सोडियम, कॅल्शियम आदी घटक असतात. शुगर क्रॅव्हिंग झालं, तर चीज खायला हरकत नाही. चीजचे क्यूब्स आपल्यासोबत कुठेही नेताही येतात.