Elaichi Benefits: भारतीय मसाल्यांमध्ये वेगवेगळ्या गोष्टींचा वापर केला जातो. ज्यात हिरवी वेलचीही फार महत्वाची ठरते. गोड पदार्थ असो वा तिखट हिरव्या वेलचीचा वापर वेगवेगळ्या पदार्थांमध्ये केला जातो. वेलचीने पदार्थांची टेस्ट तर वाढतेच, सोबतच याचे आरोग्यालाही अनेक फायदे होतात. पण अनेकांना वेलचीच्या सेवनाने होणारे फायदे माहीत नसतात. अशात तुम्हाला आज आम्ही रोज रात्री दोन हिरव्या वेलची खाण्याचे काय फायदे होतात हे सांगणार आहोत. जे वाचल्यावर तुम्ही रोज न विसरता वेलची खाणार.
चांगली झोप लागेल
आजकाल कामाच्या वाढत्या तणावासोबतच इतरही अनेक गोष्टींचा तणाव असतो. ज्यामुळे रात्री लवकर आणि चांगली झोप लागत नाही. जर झोप पूर्ण झाली नाही आणि झोपेची क्वालिटी चांगली नसली तर याचा आरोग्यावर वाईट प्रभाव पडतो. जर तुम्हाला रात्री चांगली झोप न लागण्याची समस्या असेल तर तुमची ही समस्या हिरव्या वेलचीच्या मदतीने दूर करता येऊ शकते. यासाठी रात्री झोपण्याआधी दोन वेलची घ्या आणि चांगल्या चावून खा. त्यानंतर हलकं कोमट पाणी प्या.
वजन कमी होईल
हिरव्या वेलचीच्या नियमित सेवनाने वजन कमी करण्यासही खूप मदत मिळते. रात्री झोपण्याआधी हिरव्या वेलचीचं सेवन केल्याने शरीरात जमा झालेली चरबी कमी करण्यास मदत मिळेल. यात पोटॅशिअम, मॅग्नेशिअम, फायबर, कॅल्शिअम आढळतात. जे वजन कमी करण्यास मदत करतात.
तोंडाचं आरोग्य
वेलची तोंडाचं आरोग्य चांगलं ठेवण्यासाठीही फायदेशीर मानली जाते. तोंडाची दुर्गंधी घालवण्यासाठी लोक नेहमीच याचं सेवन करतात. पण याने काही वेळासाठीच दुर्गंधी दूर होते. अशात रोज रात्री झोपण्याआधी दोन वेलची चांगल्या चावून खाव्यात वरून कोमट पाणी प्यावं. याने जास्त फायदा मिळेल.