विशेष मोहिमेत ६१४० नागरिकांचे लसीकरण

गोंदिया : कोरोना विरोधी लढ्यात जास्तीत जास्त नागरिकांचे लसीकरण करण्यासाठी नगरपरिषदेने शहरात १० लसीकरण केंद्रे सुरू करून १५ व १६ तारखेला विशेष लसीकरण मोहीम राबविली होती. या २ दिवसीय विशेष मोहिमेत शनिवारी (दि.१५) शहरातील ४६५१ नागरिकांचे तर रविवारी (दि.१६) शहरातील १४८९ नागरिकांचे असे एकूण ६१४० नागरिकांचे लसीकरण करण्यात आले आहे.

कोरोनाच्या दुसऱ्या लाटेने कहर केला आहे; मात्र आता कोरोनाशी लढण्यासाठी लसीचे कवच हाती आले असून,जास्तीत जास्त लसीकरण करून कोरोनाला हरविता येणार आहे. यामुळेच आता शासनाकडून जास्तीत जास्त नागरिकांचे लसीकरण करण्यावर भर दिला जात आहे. अशात मध्यंतरी १८ वर्षांवरील नागरिकांसाठी लसीकरणाला परवानगी देण्यात आली होती. मात्र, आता त्यावर बंदी घालण्यात आली असून, ४५ वर्षांवरील नागरिकांना पहिली लस देण्यावर जोर दिला जात आहे; मात्र सध्याच्या ठराविक केंद्रांवर गर्दी होत असल्याने त्याला आवर घालणे गरजेचे असून, नागरिकांना सोयीचे व्हावे हेही गरजेचे आहे. यातूनच नगरपरिषदेने शहरातील १० शाळांमध्ये १५ व १६ तारखेला विशेष लसीकरण मोहीम हाती घेत लसीकरण केंद्र सुरू केले आहे.

यात मोहिमेच्या पहिल्या दिवशी शनिवारी (दि.१५) या १० केंद्रांवर ४६५१ नागरिकांचे लसीकरण करण्यात आले. ४५ वर्षांवरील नागरिकांनी या केंद्रांवर लसीचा पहिला डोस घेतला आहे. तर रविवारी (दि.१६) या केंद्रांवर १४८९ नागरिकांनी लसीकरण करून घेतले आहे. अशाप्रकारे या २ दिवसीय विशेष लसीकरण मोहिमेत एकूण ६१४० नागरिकांनी लसीकरण करून घेत या विशेष मोहिमेचा लाभ घेतला आहे.

-------------------------------

आता ५ केंद्रांवर सुरू आहे लसीकरण

नगरपरिषदेने २ दिवसांसाठी घेतलेल्या या विशेष मोहिमेनंतर आता सोमवारपासून (दि.१७) शहरातील १० केंद्रांमधील ५ केंद्रांवर लसीकरण केले जाणार आहे. यामध्ये गोविंदपूर शाळा, गणेशनगर शाळा, मरारटोली शाळा, मनोहर म्युनिसिपल स्कूल व रेलटोली शाळेचा समावेश आहे. विशेष म्हणजे, मंगळवारपासून (दि.१८) शहरातील सिव्हिल लाईन्स परिसरातील नागरिकांच्या सोयीसाठी इंजिनशेड शाळेत लसीकरण केंद्र सुरू होणार आहे. तसेच मरारटोली येथेही आता सर्वसामान्यांसाठी लसीकरण केंद्र सुरू करण्यात आले आहे. तर कुंभारेनगर येथे फ्रंटलाईन वर्कर्ससाठी विशेष लसीकरण केंद्र सुरू आहे.

------------------------------------------

प्रतिसाद बघता केंद्र व कालावधी वाढविता येणार

जास्तीत जास्त नागरिकांचे लसीकरण करण्यावर भर दिला जात असून यासाठी नगर परिषदेने सर्वप्रथम १० लसीकरण केंद्रे सुरू केली; मात्र नागरिकांचा कमी प्रतिसाद असलेल्या ५ केंद्रांना बंद करण्यात आले असून ५ केंद्रे सुरू करण्यात आली आहेत. तसेच ज्या भागात गरज आहे तेथे केंद्र सुरू केले जात आहे. एकंदर नागरिकांचा प्रतिसाद बघता हे केंद्र व त्यांचा कालावधी वाढविता येणार असल्याचे मुख्याधिकारी करण चव्हाण यांनी सांगितले.