गोंदिया : मृतदेहावर अंत्यसंस्कार करण्यासाठी मृताचा मुलगा व गावकऱ्यांना अडवून मारण्यासाठी बापलेक धावले. गोरेगाव पोलिस ठाण्यांतर्गत ग्राम पठाणटोला-निंबा येथील श्मशान भूमीत ११ मार्च रोजी दुपारी १२ वाजता दरम्यान हा प्रकार घडला.
फिर्यादी दुर्योधन धरमदास सोनवाने (३६, रा. पठाणटोला) यांचे वडील मरण पावल्याने त्यांचे अंत्यसंस्कार करण्यासाठी फिर्यादीचे नातेवाईक व गावकरी पठाणटोला-निंबा येथील स्मशानभूमीत गेले. अंत्यसंस्कारासाठी ट्रॅक्टरमध्ये ठेवलेली लाकडे उरतवीत असताना आरोपी पृथ्वीराज नत्थूलाल पारधी (४६) व दोषेंद्र पृथ्वीराज पारधी (२३, रा. पठाणटोला) यांनी अडविले. यावर फिर्यादी दुर्योधन व गावकरी लाकडे का उतरवू देत नाही याबाबत विचारणा करण्यासाठी गेले असता आरोपी बापलेकाने त्यांना अंत्यसंस्कार करण्याची परवानगी दाखवा, असे बोलून मारण्यासाठी धावले. फिर्यादीच्या तक्रारीवरून पोलिसांनी १८ मार्च रोजी सायंकाळी ७:३५ वाजता भादंवि कलम २९७, ५०४, ३४ अंतर्गत गुन्हा नोंद केला आहे.