सह महिन्यांनंतर प्लॅटफाॅर्म तिकीट दर पूर्ववत

गोंदिया : रेल्वे विभागाने तब्बल सहा महिन्यांच्या कालावधीनंतर प्लॅटफाॅर्म तिकीटदर ५० रुपयांवरून पूर्ववत दहा रुपये केले आहे. याची अंमलबजावणी बुधवारपासून (दि. १५) करण्यात आली. यामुळे नागरिकांना दिलासा मिळाला आहे.

कोरोनाचा संसर्ग लक्षात घेत रेल्वे स्थानकावरील गर्दी कमी करण्यासाठी रेल्वे विभागाने प्लॅटफाॅर्म तिकीट दर १० रुपयांवरुन ५० रुपये केले होते. त्यामुळे रेल्वे स्थानकावर नातेवाईक व मित्र परिवाराला सोडणे चांगलेच महागडे झाले होते. मागील सहा महिन्यांपासून प्लॅटफाॅर्म तिकीट दर ५० रुपये होता. मागील दोन तीन महिन्यांपासून कोरोनाचा संसर्ग आटोक्यात येऊन आणि रेल्वे प्रवासी वाहतूक सेवा पूर्ववत सुरु होऊनसुद्धा रेल्वे विभागाने प्लॅटफाॅर्म तिकीट दर पूर्ववत केले नव्हते. त्यामुळे नागरिकांनी यावर आक्षेप घेत रोष व्यक्त केला होता. काही रेल्वे स्थानकावर प्लॅटफाॅर्म तिकीट दर दोन महिन्यापूर्वीच पूर्ववत करण्यात आले होते. पण गोंदिया रेल्वे स्थानकावर प्लॅटफाॅर्म तिकिटासाठी ५० रुपये आकारले जात होते. यासंदर्भात दक्षिण पूर्व मध्य रेल्वे गोंदिया स्टेशन सल्लागार समितीने नागपूर विभाग मंडळ व्यवस्थापक मनिंदसिंह उप्पल यांना निवेदन देऊन प्लॅटफाॅर्म तिकीट दर पूर्ववत करण्याची मागणी केली होती. त्याचीच दखल रेल्वे विभागाने बुधवारपासून प्लॅटफाॅर्म तिकीट दर पूर्ववत १० रुपये केले आहे. यामुळे नागरिकांना दिलासा मिळाला आहे.

..............

एमएसटी पूर्ववत सुरु करा

मागील दीड वर्षांपासून रेल्वेने कोरोनामुळे मंथली सिजन पास (एमएसटी) बंद केले आहे. यामुळे दररोज अपडाऊन करणाऱ्यांना प्रवाशांना आर्थिक भुर्दंड सहन करावा लागत आहे. गोंदिया ते नागपूर आणि गोंदिया-बल्लारशा या मार्गावर दररोज अपडाऊन करणाऱ्या प्रवाशांची संख्या चार ते पाच हजार आहे. एमएसटी बंद असल्याने त्यांना आर्थिक भुर्दंड सहन करावा लागत आहे. त्यामुळे एसएसटी पूर्ववत सुरु करण्याची मागणी गोंदिया स्टेशन सल्लागार समितीने केली आहे.

..............

दररोज २०० प्लॅटफाॅर्म तिकिटांची विक्री

हावडा-मुंबई मार्गावरील गोंदिया रेल्वे स्थानक हे प्रमुख रेल्वे स्थानक आहे. सद्यस्थितीत या रेल्वे स्थानकावरुन ४७ रेल्वेगाड्या धावत असून ५ ते ७ हजार प्रवासी करीत आहे. या रेल्वे स्थानकावरून दररोज २०० प्लॅटफाॅर्म तिकिटांची विक्री होते. मागील सहा महिन्यांत प्लॅटफाॅर्म तिकिटाचा दर ५० रुपये केल्याने रेल्वे विभागाला चांगला महसूल प्राप्त झाला.