वऱ्हाड्यांचा ट्रॅक्टर उलटला

साक्षगंधाचा कार्यक्रम आटोपून गावाकडे परत येत असलेला वऱ्हाड्यांचा ट्रॅक्टर उलटल्याने १९ जण जखमी झाले. त्यापैकी गंभीर जखमी असलेल्या सहा जणांना पुढील उपचारासाठी गोंदियाला हलविण्यात आले.

देवरी : साक्षगंधाचा कार्यक्रम आटोपून गावाकडे परत येत असलेला वऱ्हाड्यांचा ट्रॅक्टर उलटल्याने १९ जण जखमी झाले. त्यापैकी गंभीर जखमी असलेल्या सहा जणांना पुढील उपचारासाठी गोंदियाला हलविण्यात आले. सायंकाळी ७.३० वाजता परसोडी गावाच्या चौकात हा अपघात झाला.
प्राप्त माहितीनुसार भोयरटोला येथील राजकुमार ताराम याचे साक्षगंध चिचगड भागी या गावात होते. तो कार्यक्रम आटोपून ३० ते ३५ वऱ्हाडी ट्रॅक्टरच्या ट्रॉलीत बसून गावाकडे परत येत होते. दरम्यान परसोडी गावाच्या चौकात रस्ता ओलांडणारा एक आॅटो अचानक समोर आल्याने ट्रॅक्टरचालकाने ट्रॅक्टर एका बाजुला केला.
मात्र यात अनियंत्रित होऊन ट्रॅक्टर उलटला. यात मंगलाबाई राऊत (३५) रा.शिलापूर, शिलाबाई ताराम (४५) रा.बोरगाव, रोशनी नेवारे (१६) रा.शिलापूर, रामकला ताराम (३२) रा.शिलापूर, लिलाबाई ताराम (५५) रा.बोरगाव डवकी, सुमित ताराम (७) रा.शिलापूर या गंभीर जखमींवर देवरीच्या ग्रामीण रुग्णालयात उपचार करून गोंदियाला रवाना करण्यात आले.
तर विमल वट्टी (४५) उर्मिला वट्टी (४५), कैलास राऊत (३०), नितू राऊत (९), जसवंता कवास (३०), छाया ताराम (२६), मनुबाई खांडवाये (४५), शिल्पा राऊत (१५) सर्व रा.शिलापूर, भागरथा धानगाये (४५) रा.पुराडा, भागरथा ताराम (५०) रा.बोरगाव, अंजना चुटे (४५) रा.भोयरटोला, कविता खांडवाये (३५) रा.जेठभावडा, दुर्गा भोयर (२२) रा.आवरीटोला यांच्यावर देवरी ग्रामीण रुग्णालयात उपचार सुरू आहेत.
दरम्यान पालकमंत्री राजकुमार बडोले व आ.संजय पुराम हे साखरीटोला येथील एका कार्यक्रमात असताना त्यांना या अपघाताचे वृत्त समजले. त्यांनी तातडीने देवरीचे ग्रामीण रुग्णालय गाठून जखमींची भेट घेऊन विचारपूस केली. (प्रतिनिधी)