पांढरीची ग्रामपंचायत ग्रामसेवकाविना पोरकी

पांढरी : परिसरातील सर्वात मोठी ग्रामपंचायत असलेल्या पांढरी येथील ग्रामपंचायत कार्यालयात कित्येक दिवसांपासून ग्रामसेवक नाही. त्यामुळे नागरिकांना प्रमाणपत्रासाठी पायपीट करावी लागत आहे.

२८ मार्चला ग्रामसेवक सुनील शहारे यांना पांढरी ग्रामपंचायतीचा प्रभार मिळाला होता. सुरुवातीपासूनच ते ग्रामपंचायतीत आले नाहीत. या ग्रामपंचायतीअंतर्गत १०७ मंजूर घरकुलांचे बांधकाम सुरू आहे. परंतु ग्रामसेवकच नसल्याने कागदपत्रांसाठी येणाऱ्या लाभार्थी व नागरिकांना आल्यापावली परत जावे लागते. गटविकास अधिकाऱ्यांकडून २७ एप्रिलला ग्रामविस्तार अधिकारी बी.यू. हुड यांना पांढरी येथील प्रभार घेण्यासंबंधी पत्र देण्यात आले आहे. पण ग्रामसेवक शहारे जार्च देण्याकरिता ग्रामपंचायतीत येत नसल्याने लाभार्थी व नागरिकांना प्रमाणपत्रावर सही कोण करणार, असा प्रश्न निर्माण झाला आहे. दरम्यान, ताबडतोब ग्रामसेवक देऊन गैरसोय टाळावी, अशी मागणी नागरिकांनी केली आहे.