Gondia News | Latest Gondia News in Marathi | Gondia Local News Updates | ताज्यबातम्या गोंदिया | गोंदिया समाचार | Gondia Newspaper

सोनिया गांधी : ब्रह्मपुरी व गोंदिया येथील जाहीर सभेत डागली तोफगजानन चोपडे/गोपालकृष्ण मांडवकर/मनोज ताजने - गोंदिया/ब्रह्मपुरीदेशभक्तांच्या सांडलेल्या रक्तातून हा देश घडला आहे. त्यांच्या समर्पणातून देश या वळणावर पोहोचला आहे. निवडणुकीपूर्वी मोठमोठी आश्वासने द्यायची, या देशाच्या भाबड्या नागरिकांना दिवास्वप्नं दाखवायची आणि सत्ता मिळताच रंग बदलायचा... हाच भाजप-सेनेचा खरा चेहरा आहे, अशा शब्दात काँग्रेस अध्यक्ष सोनिया गांधी यांनी गोंदिया व ब्रह्मपुरी येथील जाहीर सभेत पंतप्रधान नरेंद्र मोदी यांच्यावर तोफ डागली.गोंदिया-भंडारा जिल्ह्यातील काँग्रेस उमेदवारांच्या प्रचारार्थ येथील सर्कस ग्राऊंडवर आणि चंद्रपूर जिल्ह्यात ब्रह्मपुरी येथील नेवजाबाई हितकारिणी महाविद्यालयाच्या प्रांगणात आयोजित भरगच्च प्रचार सभेत त्या बोलत होत्या. ‘परमपूज्य डॉ.बाबासाहेब आंबेडकर यांच्या कर्मभूमीला मी नमन करते,’ अशा शब्दात भाषणाची सुरूवात करताच टाळ्यांचा एकच गजर झाला आणि सोनिया गांधी यांनी ही सभा जिंकली.ब्रह्मपुरी येथे दुपारी दुपारी ३.५० वाजता व गोंदिया येथे सायंकाळी ५.४० वाजता सोनिया गांधी यांचे हेलिकॉप्टरने सभास्थळी आगमन झाले. त्यांनी आपल्या भाषणात भाजप आणि शिवसेनेला टार्गेट केले. त्या म्हणाल्या, मोठमोठी आश्वासने देणाऱ्या पंतप्रधान नरेंद्र मोदी यांच्या कारकिर्दीची लक्तरे अवघ्या १०० दिवसांतच वेशीवर टांगल्या गेली आहेत. ‘अच्छे दिन’ ही घोषणा फुसकाबार ठरली आहे. देशाचा विकास शांती आणि सद्भावनेतून होत असतो. त्याला दिखारुगिरीची गरज नसते. केवळ घोषणांनी आणि पोकळ आश्वासनांनी देश चालत नसून त्यासाठी त्याग आणि समर्पणाची भावना असावी लागते. ही भावना स्वातंत्र्यपूर्व काळापासून केवळ काँग्रेस पक्षातच असल्याचे त्या म्हणाल्या.प्रयत्नांच्या प्रचंड पराकाष्ठेनंतर देश आज चांगल्या वळणावर आला आहे. मात्र, केंद्रात आपले सरकार आल्यापासूनच जणू विकास घडल्याचे भाजपा भासवत आहे. सत्तेवर आल्यावर १०० दिवसांत महागाई कमी करून दाखवू म्हणणाऱ्या मोदी सरकारने केली काय? काळा पैसा बाहेर काढला? की, बेरोजगारांना रोजगार देण्याची घोषणा केली? असे प्रश्न उपस्थित करून सत्ता मिळविणे हाच भाजपचा एकसूत्री कार्यक्रम असल्याचा घणाघात सोनिया गांधी यांनी केला.काँग्रेसने आदिवासींच्या उत्थानासाठी ट्रायबल बिल आणले. काही भागात नक्षल समस्येला तोंड द्यावे लागत आहे. या भागातील मुलांना तांत्रिक शिक्षण देऊन त्यांचे जीवन सुधारण्यासाठी काँग्रेस सरकारने प्रयत्न केले, पण नवीन सरकारने काँग्रेसच्या काळातील चांगल्या योजना बंद करण्याचा घाट रचला आहे. आम्ही केंद्रात आणि राज्यात सत्तेत असताना सामाजिक सद्भावना कायम ठेवण्यासाठी आणि समाजातील प्रत्येक घटकाला न्याय देण्यासाठी प्रयत्न केले. विकासाची ही गती अशीच कायम ठेवण्यासाठी राज्यात पुन्हा काँग्रेसचे सरकार आणा, असे भावनिक आवाहन त्यांनी केले. शिवाय नाव न घेता राष्ट्रवादी काँग्रेस पक्षाच्या विश्वासार्हतेवरदेखील प्रश्नचिन्ह उपस्थित केले. त्या म्हणाल्या, कालपर्यंत आमच्यासोबत सत्तासुख भोगणारे लोक आज आमच्याच विरोधात बोलत आहेत. मात्र निवडणुकीनंतर ते कोणासोबत जातील याचा काही नेम नाही. त्यामुळे अशा सत्तालोलुपांपासूनही सावध राहण्याची खरी गरज आहे.याप्रसंगी प्रदेशाध्यक्ष माणिकराव ठाकरे यांनी आपल्या भाषणातून गांधी सागर प्रकल्प आणि स्व. राजीव गांधी यांच्यातील भावनिक धागा सोनिया गांधी यांच्यासमोर उलगडला. ते म्हणाले, ज्या प्रकल्पासाठी सोनिया गांधी यांनी निधी उपलब्ध करून दिला, त्या गांधी सागर प्रकल्पाची कोनशिला स्व. पंतप्रधान राजीव गांधी यांनी रचली होती. हा प्रकल्प या क्षेत्राचे रुप पालटेल. त्यांनी स्वतंत्र विदर्भाबाबत भाजपचा खोटारडेपणा उघड झाल्याचे सांगितले. विदर्भ राज्य करण्याच्या बाता करणाऱ्या नेत्यांनी आपल्या जाहीरनाम्यात याबाबत ‘ब्र’ देखील काढला नाही.ब्रह्मपुरी येथील सभेचे संचालन, प्रास्ताविक आमदार विजय वडेट्टीवार यांनी तर आभार जिल्हाध्यक्ष प्रकाश देवतळे यांनी मानले. गोंदियातील काँग्रेस उमेदवार आ.गोपालदास अग्रवाल यांनी प्रास्ताविकात काँग्रेसशासित केंद्र सरकारने गोंदिया जिल्ह्याला भरपूर दिले. त्यासाठी आम्ही केंद्र आणि राज्य सरकारकडे कसा पाठपुरावा केला, याचे विवेचन केले.सभेला काँग्रेसचे प्रदेश प्रभारी मोहन प्रकाश, माजी खासदार गेव्ह आवारी, काँग्रेसचे आमगावमधील उमेदवार रामरतन राऊत, तिरोड्यातील पी.जी. कटरे, अर्जुनी मोरगावचे राजेश नंदागवळी व भंडारा जिल्ह्यातील उमेदवार तसेच आमदार विजय वडेट्टीवार, माजी आमदार अविनाश वारजूकर, जिल्हाध्यक्ष प्रकाश देवतळे आदी उपस्थित होते. यावेळी मोठ्या संख्येने नागरिक उपस्थित होते.अमेरिका भेटीचे फलित काय?पंतप्रधान मोदींनी मोठा गवगवा करीत अमेरिका दौरा केला. या दौऱ्यात त्यांनी काय मिळवले आणि काय कमावले हे त्यांनाच ठाऊक. सरकार दुर्बलांना अधिकारसंपन्न बनविण्यासाठी असते की कमजोर, असा प्रश्न उपस्थित करुन सोनिया गांधी म्हणाल्या, नरेंद्र मोदी यांनी अमेरिकेत अत्यंत नुकसानकारक निर्णय घेतला. त्यांनी विदेशी जीवनरक्षक औषधींच्या किमती कितीतरी पटींनी वाढविल्या असून याची किंमत सर्वांना चुकवावी लागेल, असा इशारा यावेळी सोनियाजींनी दिला.अन् सोनिया गांधी जनतेतसभेनंतर सोनिया गांधी मंचावरुन उतरुन थेट जनतेकडे आल्या. त्या जवळ आल्याचे बघून हजारोंचा जनसमुदाय बॅरिकेटजवळ पोहोचला. या जनसमुदायाला त्यांनी जवळून अभिवादन केले. अनेक महिलांशी हस्तांदोलनही केले. एक क्षणी चक्क बॅरिकेटवर चढून त्यांनी जनतेचे अभिवादन स्वीकारले. त्यांचा उत्साह अपार होता. मात्र, सुरक्षा यंत्रणेची दमछाक सुरू होती.

Gondia (Marathi News)