Gondia News | Latest Gondia News in Marathi | Gondia Local News Updates | ताज्यबातम्या गोंदिया | गोंदिया समाचार | Gondia Newspaper

देवानंद शहारे - गोंदियामहाराष्ट्र राज्य परिवहन महामंडळाच्या बसेसवर अनधिकृतपणे स्टिकर, पोस्टर व बस स्थानक परिसरात होर्डिंग्स लावून जाहिरात करणाऱ्यांवर आता पोलीस कारवाई करण्यात येणार आहे. याबाबतची सूचना गोंदिया आगाराने रामनगर पोलीस ठाण्यालासुद्धा दिली आहे.एसटी महामंडळाच्या बसेस व स्थानकावरही काही संधीसाधू आपल्या व्यवसायाच्या प्रचार व प्रसिद्धीसाठी स्टिकर व पोस्टर लावतात. त्यासाठी रीतसर परवानगी घेतली जात नाही. त्यामुळे बसेस व स्थानकाचे विद्रुपीकरण होत असून महसूलसुद्धा बुडतो. अशा जाहिरातबाजांवर आता कारवाईचा बडगा उगारण्यात येणार आहे. याबाबत बस स्थानक परिसरात होर्डिंग्स लावू नये, अशा सूचना गोंदियाच्या बस स्थानकावर संगणकीय उद्घोषणेद्वारे केल्या जात आहेत. मात्र फुकटच्या जाहिरातबाजांवर आवर घालणे कठिण होत आहे.महाराष्ट्र राज्य सार्वजनिक मालमत्ता विद्रुपीकरण कायदा २००५ नुसार रूग्णालये, रेल्वे स्थानक, बस स्थानक आदी सार्वजनिक ठिकाणी अनधिकृतपणे जाहिराती लावू नये किंवा जाहिराती लावायच्याच असतील तर संबंधित करारबद्ध कंपन्यांकडून रीतसर परवानगी घेवून लावावे, असे नियम आहेत. मात्र बस स्थानक परिसरात संधी साधून होर्डिंग्स लावण्यात येत असल्याचे प्रकार आढळले आहेत. दुसऱ्या दिवशी एसटीच्या कर्मचाऱ्यांकडून सदर जाहिरातीवरील मोबाईल क्रमांक व इतर माहिती संकलित केली जात आहे. अशा जाहिरातबाजांना एकदा समज दिली जात असून पुन्हा तसाच प्रकार आढळला तर पोलीसांत तक्रार केली जाते. असे प्रकार घडत असल्याची सर्वसामान्य तक्रार सध्या रामनगर पोलीस ठाण्यात देण्यात आली आहे. गोंदिया आगाराच्या बसेस नांदेड, अकोला व अमरावती अशा दूर ठिकाणाहून परतल्या की बसच्या आत किंवा बाहेर जाहिरातीचे स्टिकर किंवा पोस्टर लावलेले आढळते. स्थानिक ठिकाणी अशा जाहिराती चिकटवल्या जात नाही. वाहक किंवा चालक लांब पल्ल्याच्या प्रवासात चहा घेण्यासाठी किंवा बस लावण्यासाठी उतरतात. नेमक्या त्याचवेळी संधी साधून बसेसमध्ये जाहिरातबाजी होत असते, असे गोंदियाचे आगार व्यवस्थापक गौतम शेंडे यांनी सांगितले.

Gondia (Marathi News)