बाधित आणि मात करणारेच सेम सेम

गोंदिया : जिल्ह्यात आता कोरोनाचा संसर्ग पूर्णपणे आटोक्यात आला आहे. कोरोना ॲक्टिव्ह रुग्णांची संख्या १०वर आली असून चार तालुके पूर्णपणे कोरोनामुक्त झाले आहेत. तर गुरुवारी (दि.२९) १ बाधितांनी मात केली तर १ रुग्णाची भर पडली. त्यामुळे बाधित आणि मात करणाऱ्यांची संख्या सेम सेम होती.

कोरोना संसर्गाच्या अनुषंगाने गुरुवारी १५८ नमुन्यांची चाचणी करण्यात आली. यापैकी १०९ नमुन्यांची आरटीपीसीआर, तर ४९ नमुन्यांची रॅपिड अँटिजन टेस्ट करण्यात आली. यात एक नमुना कोरोना पॉझिटिव्ह आला. त्याचा पॉझिटिव्हिटी रेट ०.६३ टक्के आहे. जिल्ह्यात आता कोरोनाबाधितांची संख्या पृूर्णपणे आटोक्यात आली असून जिल्ह्याची कोरोनामुक्तीच्या दिशेने वाटचाल सुरू आहे. त्यामुळे जिल्हावासीयांसाठी ही निश्चितच दिलासादायक बाब आहे. कोरोना संसर्गाच्या अनुषंगाने आतापर्यंत २१६६९६ नमुन्यांची चाचणी करण्यात आली. तर २१७३५० नमुन्यांची रॅपिड अँटिजन टेस्ट करण्यात आली. जिल्ह्यात आतापर्यंत ४११८७ कोरोनाबाधित आढळले असून यापैकी ४०४७६ बाधितांनी कोरोनावर मात केली आहे. सद्यस्थितीत १० कोरोना ॲक़्टिव्ह रुग्ण आहेत. कोरोनाबाधितांपेक्षा मात करणाऱ्यांची संख्या अधिक असल्याने कोरोनाचा रिकव्हरी रेट ९८.२७ टक्क्यांवर पोहोचला आहे.

..................

दुसऱ्या डोससाठी वेटिंग लिस्ट

कोरोनाला प्रतिबंध लावण्यासाठी लसीकरणावर भर दिला जात आहे. जिल्ह्यात आतापर्यंत ५८४२४५ नागरिकांचे लसीकरण करण्यात आले आहे. यापैकी ४६३४७० नागरिकांना पहिला, तर १२०७७५ नागरिकांना दुसरा डोस देण्यात आला आहे. दुसऱ्या डोसच्या प्रतीक्षेत असलेल्यांच्या संख्येत वाढ होत आहे. तर वेटिंग लिस्ट वाढत चालली आहे.

...........