नववर्षात जिल्ह्यात पडली १०९२ बाधितांची भर
By लोकमत न्यूज नेटवर्क | Updated: March 18, 2021 04:28 IST2021-03-18T04:28:36+5:302021-03-18T04:28:36+5:30
गोंदिया : कोरोनाने पुन्हा एकदा पाय पसरण्यास सुरुवात केली असून जिल्ह्यातील बाधितांची संख्या झपाट्याने वाढत असताना दिसत आहे. फेब्रुवारी ...

नववर्षात जिल्ह्यात पडली १०९२ बाधितांची भर
गोंदिया : कोरोनाने पुन्हा एकदा पाय पसरण्यास सुरुवात केली असून जिल्ह्यातील बाधितांची संख्या झपाट्याने वाढत असताना दिसत आहे. फेब्रुवारी महिन्यापासून कोरोनाचा हा उद्रेक दिसत असला तरी नववर्षात जिल्ह्यात १०९२ बाधितांची भर पडली आहे. मात्र, आता परिस्थिती पुन्हा चिघळत चालली असल्याचे दिसत आहे.
सन २०२० मध्ये मार्च महिन्यातच कोरोना देशात शिरला होता व अवघ्या देशाला हेलावून सोडले होते. वर्षभर कोरोनातच गेला होता व दिवाळीनंतर रुग्णसंख्या आटोक्यात येत असताना दिसत होती. त्यानंतर रुग्णसंख्या घटत गेल्याने दिलासा मिळाला होता. अशात डिसेंबर महिन्यात केंद्र शासनाने देशातीलच २ लसींना मंजुरी दिल्यानंतर नववर्षात १६ जानेवारीपासून अवघ्या देशात लसीकरणाला सुरुवात झाली. नववर्षातील हा जानेवारी महिना दिलासा देणारा ठरला असतानाच फेब्रुवारी महिन्यात पुन्हा एकदा राज्यात कोरोनाचा उद्रेक सुरू झाला आहे. बघता-बघता फेब्रुवारी महिना गेला व मार्च महिन्यात कोरोनाने आपले पाय पसरण्यास सुरुवात केली असून बाधितांच्या संख्येत भर पडू लागली आहे. नववर्षातील मार्च महिन्यातील १६ तारखेपर्यंतची आकडेवारी बघितल्यास जिल्ह्यात १०९२ बाधितांची भर पडली आहे. यामध्ये जानेवारी महिन्यात ४६९, फेब्रुवारी महिन्यात २४२ तर मार्च महिन्यातील १६ तारखेपर्यंत ३८१ नवीन बाधितांची नोंद घेण्यात आली आहे. विशेष म्हणजे, नववर्षातील आतापर्यंत काळ चांगला गेला. मात्र, आता राज्यात दुसरी लाट आल्याचे बोलले जात असल्याने व बाधितांची संख्या झपाट्याने वाढत असल्याने पुढचा काळ मात्र कठीण दिसून येत आहे.
----------------------------
१५ दिवसांत ३८१ बाधितांची नोंद
जिल्ह्यात जानेवारी महिन्यात ४६९ तर फेब्रुवारी महिन्यात २४२ बाधितांची नोंद घेण्यात आली आहे. असे असतानाच मात्र मार्च महिन्यात १६ तारखेपर्यंत ३८१ बाधितांची नोंद घेण्यात आली आहे. एकंदर मार्च महिन्यातील या अर्ध्या दिवसांत ३८१ बाधितांची भर पडली असून बाधितांची संख्या वाढत चालली असताना आता पुढे मात्र आणखी किती रुग्ण वाढतात हे सांगणे कठीण आहे.
----------------------------
खबरदारी बागळणे गरजेचे
कोरोनाचा वाढता उद्रेक बघता शासनाकडून नागरिकांना खबरदारी घेण्याचे आवाहन केले जात आहे. मात्र, नागरिकांकडून आता कोरोनाला विसरून आपला मनमर्जीपणा सुरू आहे. मास्क न लावता फिरणे, शारीरिक अंतराचे पालन न करणे असे प्रकार सर्रास सुरू आहेत. मात्र, या निष्काळजीपणामुळेच कोरोनाला पुन्हा एकदा पाय पसरण्यास वाट मिळाली असून हा प्रकार धोक्याचा ठरत आहे.