महाराष्ट्र एक्स्प्रेसमध्ये टीटीई करताहेत लूट

आरक्षण नसलेल्या प्रवाशांकडून थेट ५0 रुपये लुटले जात असल्याचा प्रकार गोंदिया-कोल्हापूर महाराष्ट्र एक्स्प्रेस या रेल्वेगाडीत कार्यरत टीटीईकडून होत आहे.

गोंदिया : आरक्षण नसलेल्या प्रवाशांकडून थेट ५0 रुपये लुटले जात असल्याचा प्रकार गोंदिया-कोल्हापूर महाराष्ट्र एक्स्प्रेस या रेल्वेगाडीत कार्यरत टीटीईकडून होत आहे. त्यामुळे प्रवाशांत कमालीचा संताप व्यक्त केला जात आहे.

प्रचाशांची वाढती संख्या पाहून वर्षभरापूर्वी रेल्वे प्रशासनाने दररोज गोंदिया येथून सुटणारी गोंदिया कोल्हापूर महाराष्ट्र एक्स्प्रेस सुरु केली. आधीपासूनच प्रवासी या गाडीत आरक्षण नसतानाही शयनयान बोगीत असून नागपूरपर्यंंंत प्रवास करीत आले आहेत. त्यातच आताही सर्वच प्रवासी नागपूरपर्यंंत सामान्य तिकीट काढून आरक्षित डब्यात बसून प्रवास करतात.

जास्तीत जास्त प्रवासी अनारक्षित प्रवास करीत असल्याने तिकीट निरीक्षक, रेल्वे प्रशासन नागपूरपर्यंंंत नियम शिथिल ठेवतात. परंतु काही लोभी टीटीईंनी यावरही पैसे कमावण्याचा उपाय शोधून काढला आहे. दररोज नागपूरपर्यंंंत जाणार्‍या प्रवाशांना आरक्षित डबा आहे. यात बसता येत नसल्याचे सांगून त्यांना दुसर्‍या डब्यात जाण्याचे सांगून त्यांच्याकडून ५0 रुपयांची मागणी केली जात आहे.

ज्यांच्याकडे पैसे नाहीत त्या प्रवाशांना उठावे लागते. तर हा प्रकार अनारक्षित प्रवाशांसह केला जात नाही तर ग्रामीण भागातील आलेल्या प्रवाशांसोबत अधिक प्रमाणात केला जातो. प्रवाशांना थेट ५0 रुपयाची मागणी केली जाते व त्यांना आरक्षण झाल्याचे सांगितले जाते. यातच दरदिवशी अप-डाऊन करणारे बोलताच ५0 रुपये देताना दिसतात. तर आरक्षणाची कसलीच पावतीही दिली जात नाही.

आरक्षणाच्या नावावर दररोज गोळा होणारा पैसा शासनाच्या तिजोरीत की टीटीईच्या खिशात जाते, हे कळत नाही. एखाद्या प्रवाशाने आपल्या नावाची वरिष्ठांकडे तक्रार करु नये यासाठी कोटावरील नेमप्लेट खिशात ठेवतात. दरम्यान एखाद्याने ५0 रुपये दिल्याची पावती मागितल्यास त्याला कारवाईचा दम दिला जातो. त्यांना नाईलाजाने पैसे द्यावे लागतात. दुसरा कोच शोधावा लागतो. या रेल्वेगाडीने दररोज शेकडो प्रवासी प्रवास करतात.

प्रत्येकी ५0 रुपयाप्रमाणे कार्यरत टीटीई एकाच दिवशी हजारो रुपये अवैधरित्या कमावतात. हा सर्व प्रकार दररोज चालतो. प्रवास करायचा असल्याने कुणीही याची तक्रार कुठेही करताना दिसत नाही. मात्र या प्रकाराबाबत प्रवाशांत संताप व्यक्त केला जात आहे. (प्रतिनिधी)