हागणदारीमुक्तीकडे गोसेचा प्रवास ‘लय भारी’

‘गाव तसं चांगलं, पण हागणदारीने वंगलं’ अशी एक म्हण प्रचलित आहे. पवनी तालुक्यातील गोसे (बुज)हे गाव ....

उपसचिवांची गावाला भेट
शौचालय वापराने घडविली क्रांती
भंडारा : ‘गाव तसं चांगलं, पण हागणदारीने वंगलं’ अशी एक म्हण प्रचलित आहे. पवनी तालुक्यातील गोसे (बुज)हे गाव हागणदारीमुक्तीकडे वाटचाल करीत असून या गावाला पाणीपुरवठा व स्वच्छता विभागाचे उपसचिव शांताराम कुदळे यांनी भेट दिली. यातून गावकऱ्यांनी शौचालय वापराचा घेतलेला निर्णय ‘लय भारी’ असल्याची प्रचिती त्यांना आली.
राज्यात स्वच्छ भारत मिशन (ग्रामीण) कार्यक्रमांतर्गत जिल्ह्यात स्वच्छता मिशन कक्ष पाणी व स्वच्छतेच्या कार्यक्रमाची अंमलबजावणी करीत आहे. या अनुषंगाने ग्राम पंचायतींना क्षेत्र भेटी देण्यासाठी कुदळे हे जिल्ह्याच्या दौऱ्यावर आले होते. त्यांनी पवनी येथे आढावा बैठक घेतली. यावेळी सर्व विभागाचे प्रमुख उपस्थित होते. दरम्यान त्यांनी राष्ट्रीय गोसेखुर्द प्रकल्पाची पाहणी केली. यानंतर त्यांनी लगतच्या गोसे बु. या गावाला भेट दिली. येथील त्यांनी शौचालयाची माहिती घेतली असता ते आश्चर्यचकित झाले. एकेकाळी उघड्यावर शौचास जाणाऱ्या गावकऱ्यांनी शौचालय बांधणीला पसंती दिली असून अनेक नागरिकांचे शौचालय बांधणीचे काम पूर्ण होण्याच्या मार्गावर आहे. यावेळी कुदळे यांनी हागणदारीमुक्तीकडे वाटचाल करणाऱ्या गोसे गावातील जलसुरक्षक यांचेकडून पाणी व स्वच्छता विषयक माहिती जाणून घेतली. यावेळी ग्रामसेविका शीतल मोहनकर यांनी ग्रामपंचायतीची लोकसंख्या, कुटुंब संख्या, पिण्याच्या पाण्याचे स्त्रोत, पाणी शुद्धीकरण प्रक्रिया, ब्लिचिंग साठ्याची उपलब्धता, शौचालय बांधकामाची स्थिती, कोरडा दिवस पाळणे आदींची माहिती दिली.
गावकरी शौचालयाचा वापर करीत असल्याने हिरव्या रंगाचे स्टीकर घरांना लावण्यात आले. यावेळी कुदळे यांनी सुंदर जीवन जगून आरोग्य सुदृढ ठेवावे अशी प्रतिक्रिया दिली. त्यांच्यासोबत जिल्हा परिषद उपाध्यक्ष राजेश डोंगरे, गोसेचे सरपंच चेतन डोंगरे, भूजल सर्व्हेक्षण विकास यंत्रणेचे उपसंचालक शाह, वरिष्ठ भूवैज्ञानिक काजी, जलसंपदा विभागाचे बालपांडे, उपमुख्य कार्यकारी अधिकारी रामदास धांडे, ग्रामीण पाणी पुरवठा विभागाचे अभियंता मैदमवार, खंडविकास अधिकारी भगत, उपकार्यकारी अधिकारी गोन्नाडे यांच्यासह शिक्षक संवाद सल्लागार राजेश्वर येरणे, प्रकल्प व्यवस्थापक डी.एस. बिसेन, बबन येरणे, पाणी गुणवत्ता सल्लागार प्रशांत मडामे, गजानन भेदे, नेत्रदिपक बोडखे उपस्थित होते. (शहर प्रतिनिधी)