आजीची एकदाणी केली नातवाच्या सुपुर्द ()

गोंदिया : सन १९९१ मध्ये चोरीला गेलेली एकदाणी पोलिसांनी चोरट्याकडून हस्तगत केली. मात्र, त्यानंतर फिर्यादी महिलेचे निधन झाले व एकदाणी पोलीस ठाण्यातच पडून राहिली. मात्र, प्रलंबित मुद्देमाल निर्गतीच्या विशेष मोहिमेंतर्गत डुग्गीपार पोलीस ठाण्याचे ठाणेदार सचिन वांगडे यांनी माहिती काढून ती एकदाणी फिर्यादी महिलेच्या नातवाच्या सुपुर्द केली.

पोलीस अधीक्षक विश्व पानसरे यांच्या निर्देशानुसार प्रलंबित मुद्देमाल निर्गतीची विशेष मोहीम राबविली जात आहे. यांतर्गत आपल्या पोलीस ठाण्यात असलेल्या किमती मुद्देमालाची निर्गती करण्याबाबत ठाणेदार वांगडे यांनी रेकॉर्डची तपासणी केली. यात त्यांना सन १९९१ मध्ये फिर्यादी फुलनबाई गेंदलाल मडावी (रा. सितेपार) यांच्या तक्रारीवरून दाखल असलेला गुन्हा क्रमांक ६३-१-९१ कलम ३८० भादंविमधील आरोपीकडून हस्तगत करण्यात आलेली सोन्याच्या ४० मण्यांची एकदाणी ही निकालाअंती पोलीस ठाण्यात मागील कित्येक वर्षांपासून प्रलंबित असल्याचे आढळले. यावर ठाणेदार वांगडे यांनी मुद्देमाल प्रलंबित असल्याचे कारण पाहून व जुने अभिलेख तपासून शहानिशा केली. यात त्यांना गुन्हा निकाली निघालेला असून गुन्ह्यातील मुद्देमाल फिर्यादीने परत नेला नसल्याने माल प्रलंबित असल्याचे कळले. यावर ठाणेदार यांनी गुन्ह्यातील फिर्यादी फुलनबाई मडावी यांचा शोध घेतला असता त्यांचा मृत्यू झाला असून वारसदार नातू बाळकृष्ण सीताराम मडावी (रा. सितेपार) हे असल्याचे सिद्ध झाले. अशात बाळकृष्ण मडावी यांना पोलीस ठाण्यात बोलावून अपर पोलीस अधीक्षक अशोक बनकर तसेच उपविभागीय पोलीस अधिकारी (देवरी) जालिंदर नालकूल यांच्या मार्गदर्शनात ठाणेदार वांगडे यांच्या हस्ते न्यायालयीन सूचनेनुसार कायदेशीररीत्या ती एकदाणी सुपुर्द करण्यात आली. ही कारवाई रायटर पोलीस हवालदार चौधरी व शिपाई भोयर यांनी केली.