पदोन्नतीत आरक्षण देऊन शासकीय सेवेतील सर्व जागा त्वरित भरा

गोंदिया : इतर कर्मचाऱ्यांप्रमाणे ओबीसी कर्मचाऱ्यांना पदोन्नतीत आरक्षण देऊन शासकीय सेवेतील रिक्त असलेल्या सर्व जागा त्वरित भराव्या. यासह मागासवर्गीय कर्मचारी व विद्यार्थ्यांच्या मागण्यांच्या अनुषंगाने राष्ट्रीय ओबीसी कर्मचारी-अधिकारी महासंघाने कॉँग्रेस कमिटीचे प्रदेशाध्यक्ष नाना पटोले यांना निवेदन देऊन चर्चा केली.

निवेदनात, ओबीसी विद्यार्थ्यांसाठी मंजूर झालेले ७२ वसतिगृह त्वरित सुरू करण्यात यावे, क्रिमिलीअरसाठी लागणारी उत्पन्न मर्यादा १५ लाखांपर्यंत करण्यात यावी, ओबीसी विद्यार्थ्यांकरिता स्पर्धा परीक्षा तयारीसाठी तालुकास्तरावर अभ्यासिका केंद्र उघडण्यात यावे, जिल्ह्यातील रोस्टरमध्ये ओबीसी कर्मचाऱ्यांवर झालेला अन्याय दूर करणे, विद्यार्थी शिष्यवृत्तीकरिता लागणारे उत्पन्नाचे दाखले व विद्यार्थ्यांच्या वैयक्तिक खात्याची अट वगळणे आदी मागण्या नमूद असून त्यावर चर्चा करण्यात आली.

यावेळी पटोले यांनी, सर्व मागण्यांसाठी सचिव स्तरावरील सभा आयोजित करण्याचे आश्वासन शिष्टमंडळाला दिले. चर्चेला जिल्हाध्यक्ष संदीप तिडके, कार्याध्यक्ष किशोर डोंगरवार, तिरोडा तालुकाध्यक्ष डी. एच. चौधरी, तालुकाध्यक्ष सदानंद मेंढे, जिल्हा समन्वयक दीपक कापसे, दिलीप लोधी, नरेंद्र बनकर, शितल कनपटे, विरेंद्र खोटेले, जितेंद्र ठवकर, भोजराज फुंडे, गजानन पाटणकर, गुणीराम ठाकरे, अरुण सावरकर, टी .के.बोपचे, बी.सी. ठाकरे, वामन मोवाडे, राजेश मरघडे, सी.बी.गोबाडे, बेनीराम भानारकर, होमराज बहेकार, आनंद मेश्राम, छगन परशुरामकर, शिशुपाल भांडारकर, कृष्णा शिवणकर उपस्थित होते.