२.२१ कोटींचा अपहार करणार्‍या नाझरवर गुन्हा दाखल

देवरी येथील तहसील कार्यालयात कार्यरत नाझर म्हणून कार्यरत असलेले नामदेव शंकर बुटे याने विविध योजनेचे २ कोटी २१ लाख ६0 हजार ६0५ रूपये बँकेतून खोट्या दस्तावेजाच्या आधारे काढले.

आरोपी फरार : देवरी तहसील कार्यालयातील प्रताप
गोंदिया : देवरी येथील तहसील कार्यालयात कार्यरत नाझर म्हणून कार्यरत असलेले नामदेव शंकर बुटे याने विविध योजनेचे २ कोटी २१ लाख ६0 हजार ६0५ रूपये बँकेतून खोट्या दस्तावेजाच्या आधारे काढले. त्या नाझर विरुध्द देवरी पोलिसांनी गुन्हा दाखल केला आहे.
अतवृष्टीने झालेल्या नुकसानीपोटी शेतकर्‍यांना द्यायच्या शासकीय मदतीचे धनादेश परस्पर वटवून त्यांचा अपहार केल्याची तक्रार तहसीलदार रवींद्र चव्हाण यांनी शनिवारी केली होतीे.
मागच्या वर्षीच्या पावसाळ्यात आणि पावसाळा संपल्यानंतरही जिल्ह्यात झालेल्या अतवृष्टीने शेतकर्‍यांच्या पिकांचे मोठे नुकसान झाले. त्यामुळे केंद्र सरकारच्या आपत्ती निवारण समितीने चमू पाठवून पिकांची पाहणी केली. राज्य सरकारनेही हिवाळी अधिवेशनात मदत जाहीर केली होती.
ही मदत नुकसानग्रस्त शेतकर्‍यांना त्यांच्या बँक खात्यात जमा करायची होती. हे काम तहसील कार्यालयामार्फत केले जात आहे. देवरी तालुक्यातील लाभार्थी शेतकर्‍यांची यादी आणि त्यांच्या मदतीच्या रकमेची यादी तहसील कार्यालयाकडून जिल्हा मध्यवर्ती बँकेकडे देण्यात आली. सोबतच त्यांच्या मदतीचा धनादेशही बँकेकडे देण्यात आला.
परंतु देवरी तहसील कार्यालयाचे नाझर नामदेव शंकर बुटे यांनी गेल्या डिसेंबर महिन्यापासून तहसीलदारांकडून बँकेकडे देण्यात आलेले धनादेश प्रत्यक्षात शेतकर्‍यांच्या खात्यावर वळते न करता स्वत:च ती रक्कम काढून घेतली. हा प्रकार डिसेंबर २0१३ ते ३ मे २0१४ या दरम्यान घडला.
ही रक्कम हडप केल्याचा प्रकार विद्यमान तहसीलदार चव्हाण यांच्या लक्षात आला. आतापर्यंत २ कोटी २१ लाख ६0 हजार ६0५ रुपयांची रक्कम हडप केल्याने देवरी पोलिसात त्याच्या विरूध्द भादंविच्या कलम ४0९, ४६७, ४६८ अन्वये गुन्हा दाखल केला आहे. देवरी पोलिसांनी गुन्हा दाखल केला मात्र नाझरला अटक करण्यात आली नाही. तो फरार असल्याचे सांगण्यात आले. (तालुका प्रतिनिधी)