कुठल्याही वयोगटातील ताप, पुरळ असू शकतो गोवर

गोंदिया : आरोग्य विभागाने मागील तीन वर्षांपासून सुरू केलेल्या प्रतिबंधात्मक लसीकरणामुळे गोवर आणि रूबेलावर बऱ्याच प्रमाणात नियंत्रण मिळविण्यात यश आले आहे. हा आजार प्रामुख्याने लहान मुलांमध्येच आढळून येते. मात्र, काही ठिकाणी मोठ्यांमध्येही या आजाराची लक्षणे आढळून येत आहेत. त्यामुळे कुठल्याही वयोगटातील व्यक्तीला ताप आणि पुरळ असल्यास ते गोवर किंवा रूबेलाचे लक्षण असण्याची शक्यता नाकारता येत नाही. या आजाराची लक्षणे दिसताच डाॅक्टरांना दाखविणे आवश्यक आहे. गोंदिया जिल्ह्यात सध्या गोवर आणि रुबेलाचा एकही रुग्ण नाही. २०१८ पासून गोवर आणि रुबेलावर प्रतिबंधात्मक लसीकरण केले जात आहे. त्यामुळे या आजाराच्या रुग्णांची संख्या नाहीच्या बरोबरीत आहे. तसेच लोकांमध्येसुद्धा बऱ्याच प्रमाणात जागरूकता निर्माण झाली आहे.

.................

असे केले जाते निदान

- लहान मुलांच्या अंगावर लालसर पुरळ येणे

- डोळे लालसर होणे, पाणी गळणे

- नाकातून पाणी गळणे

- सतत तीन-चार दिवस ताप असणे

....................

१०० टक्के गोवर, रुबेलाचा लसीकरण

आरोग्य विभागाच्या वतीने सन २०१८ पासून ९ ते १५ महिन्यांच्या बालकांना गोवर आणि रुबेलाचे प्रतिबंधात्मक लसीकरण केले जात आहे. हे लसीकरण अनिवार्य करण्यात आले असल्याने मागील दोन वर्षांपासून जिल्ह्यात गोवर आणि रुबेलाच्या रुग्णांचे प्रमाण नगण्य आहे. ९ ते १५ महिने वयोगटातील बालकांना गोवर आणि रुबेलाचे शंभर टक्के लसीकरण करण्यात आले आहे.

............

...तर त्वरित घ्या डॉक्टरांचा सल्ला

लहान मुलांच्या अंगावर लालसर पुरळ अथवा तीन-चार दिवस ताप असल्यास ही लक्षणे गोवरची असू शकतात. त्यामुळे अशी लक्षणे दिसताच त्वरित जवळचे रुग्णालय गाठून डॉक्टरांना दाखवून उपचार करून घेणे आवश्यक आहे. यामुळे संसर्ग आटोक्यात आणण्यास मदत होते.

................

रुग्णांचे प्रमाण नगण्य

९ ते १५ महिन्यांपर्यंतच्या बालकांना आरोग्य केंद्र व खासगी रुग्णालयातसुद्धा गोवर, रुबेलाचे प्रतिबंधात्मक लसीकरण केले जात आहे. त्यामुळे या आजाराच्या रुग्णांचे प्रमाण नगण्य आहे. जिल्ह्यात मागील वर्षभरात या आजाराच्या रुग्णांची नोंद झालेली नाही. यासाठी लसीकरण हे प्रभावी ठरत आहे.

- डाॅ. सुनील देशमुख, बालरोग तज्ज्ञ