जिल्ह्यात ७२६ गावांत सार्वजनिक गणपतीची स्थापना

गोंदिया : महाराष्ट्राचे लाडके दैवत असलेल्या गणरायाचे स्वागत शुक्रवारी (दि. १०) वाजत-गाजत करण्यात आले. यंदा जिल्ह्यात ७२६ ठिकाणी सार्वजनिक, तर ५२६७ घरांत गणपतीची स्थापना केली आहे.

गणरायाचे आगमन होणार असल्याने सकाळपासूनच मूर्तिकारांकडे नागरिकांची गर्दी दिसून आली, तर काहींनी गुरुवारी रात्रीच आपल्या बाप्पाला घरी नेल्याचेही दिसले. साक्षात गणपती येणार असल्याने हे १० दिवस नवचैतन्याने भारलेले असतात. विशेष म्हणजे, घरातील चिमुकल्यांना बाप्पाचे जास्त आकर्षण राहत असल्याने त्यांचा आनंद वेगळाच असतो. त्यामुळे त्यांची सकाळपासूनच धूम दिसून आली, तर दुसरीकडे बाप्पा येणार असल्यामुळे बाप्पाच्या पूजेच्या व नैवेद्याच्या तयारीची लगबग महिलांमध्ये सुरू असल्याचे दिसून आले. बाप्पाचे लाडके मोदक तयार करण्यासाठी महिलांची धावपळ सुरू होती.

गणेशोत्सवात दरवर्षी विविध कार्यक्रम घेतले जातात. त्या कार्यक्रमांना मोठ्या प्रमाणात गर्दी राहायची. परंतु कोरोनामुळे यंदाच्या गणेशोत्सवात गर्दी नाही, तर फिजिकल डिस्टन्सिंगचे पालन व तोंडाला मास्क लावणे आवश्यक राहणार आहे. आरतीची जबाबदारी मोजक्याच कार्यकर्त्यांवर देऊन तेही फिजिकल डिस्टन्सिंगचे पालन करतील, असे ठरविण्यात आले आहे. गणेशोत्सव शांततेत पार पडावा यासाठी जिल्हा पोलिसांकडून पथके तयार करण्यात आली आहेत.

------------------------

चौका-चौकात पोलिसांचा बंदोबस्त

गणपती उत्सवात काही अनुचित प्रकार घडू नये यासाठी खबरदारी म्हणून चौका-चौकात पोलीस बंदोबस्त लावण्यात आल्याचे दिसून येत आहे. याशिवाय दंगल नियंत्रक तीन पथके, चार उपविभागीय अधिकाऱ्यांकडे प्रत्येकी एक ट्रॅकिंग फोर्स, पोलीस अधीक्षक व अप्पर पोलीस अधीक्षक यांच्याकडे प्रत्येकी एक ट्रॅकिंग फोर्स सी-६० चे पथक राहणार आहेत. शिवाय बॉम्बशोधक, नाशक पथकही नेमण्यात आले आहे. शांततेत गणेशोत्सव साजरा करण्यात यावा, यासाठी पोलिसांनी आपापल्या पोलीस ठाण्याच्या हद्दीतील गणेश मंडळ पदाधिकाऱ्यांच्या बैठका घेऊन त्यांना नियमावली समजावून सांगितली आहे. त्यातही गर्दी होणार नाही, याची काळजी घ्यावयाची असून मिरवणुकीला बंदी घालण्यात आली आहे. कोरोनाचे नियम सर्वांना पाळावे लागणार आहेत.

..................

असे राहणार ‘एक गाव-एक गणपती’

गोंदिया शहरात २, गोंदिया ग्रामीण पोलीस ठाण्यांतर्गत २२, रावणवाडी पोलीस ठाण्यांतर्गत ३१, तिरोडा पोलीस ठाण्यांतर्गत ३९, गंगाझरी पोलीस ठाण्यांतर्गत १८, दवनीवाडा पोलीस ठाण्यांतर्गत ९, आमगाव पोलीस ठाण्यांतर्गत २९, गोरेगाव पोलीस ठाण्यांतर्गत ३१, सालेकसा पोलीस ठाण्यांतर्गत १६, देवरी पोलीस ठाण्यांतर्गत ३४, चिचगड पोलीस ठाण्यांतर्गत ४६, डुग्गीपार पोलीस ठाण्यांतर्गत ४४, नवेगावबांध पोलीस ठाण्यांतर्गत २२, अर्जुनी-मोरगाव पोलीस ठाण्यांतर्गत ३९, तर केशोरी पोलीस ठाण्यांतर्गत २२ गावांत एकाच गणपतीची स्थापना केली जाणार आहे.