विडी उद्योगास उतरती कळा

दिवसाही सुरू असतात पथदिवे

गोंदिया : जिल्हास्थळ असलेल्या शहरात नगर परिषदेच्या दुर्लक्षितपणामुळे भरदिवसाही पथदिवे सुरू असतात. त्यामुळे नगर परिषदेवर विजेचा भुर्दंड बसत असतो. याकडे लक्ष देण्याची गरज आहे.

धान पिकाच्या भरपाईची मागणी

परसवाडा : परिसरामध्ये धान पिकावर किडीने आक्रमण केले असून, हाती आलेले पीक पूर्णपणे नष्ट होत आहे. धान पिकांचा पूर्णपणे निसवा झाला असून, पंधरा दिवसांमध्ये धान पिके निघणार होती. मात्र, धान निसवल्यावर किडीने आक्रमण केल्याने अनेकांच्या शेतातील धान पिकाची तणस झाली आहे. पंचनामे करून शेतकऱ्याला हेक्टरी हजारो रुपयांचे नुकसान झाले आहे. शेतकऱ्यांनी नुकसान भरपाई देण्याच्या मागणी केली आहे.

किसान सन्मान योजनेपासून वंचित

साखरीटोला : सरकारने कोरोना संकटकाळात दिलासा मिळावा यासाठी किसान सन्मान योजनेच्या माध्यमातून दोन हजार रुपयांचा हप्ता जमा केला. या योजनेतून अनेकांना लाभ मिळाला. मात्र, अद्यापही अनेक शेतकऱ्यांना वारंवार शासकीय कार्यालयाचे उंबरठे झिजवूनही योजनेचा लाभ मिळाला नाही.

रस्त्यावरील खड्ड्यांमुळे अपघातांची शक्यता

तिरोडा : शहरातील उपमुख्य रस्त्यांवर अनेक खड्डे निर्माण झाले आहेत. या खड्ड्यांमुळे अपघाताची शक्यता नाकारता येत नाही. काही खड्ड्यांमध्ये भरण घालण्यात आले असले तरी ते साहित्य रस्त्यावर पसरले आहे. त्यामुळे रस्ते अरुंद होत आहेत. आवागमनास अडथळा निर्माण होत आहे.

डासांचा प्रादुर्भाव वाढला

गोंदिया : शहरातील नाल्या उपसण्यात न आल्याने कचऱ्याने तुंबल्या आहेत. परिणामी डासांचा प्रादुर्भावही मोठ्या प्रमाणात वाढला आहे. यासंबंधी नगर परिषदेकडे निवेदने देण्यात आली. मात्र, अद्यापही नाल्या उपसण्यात आल्या नाहीत.

बँकेत दलालांमार्फत सर्वसामान्यांची लूट

गोंदिया : तालुक्यातील राष्ट्रीयीकृत बँकांमध्ये दलालांचा सुळसुळाट निर्माण झाला आहे. बँकेतील कामे दलालांमार्फत केल्यास तात्काळ होत असल्याने सर्वसामान्यांना आर्थिक फटका बसत आहे. याकडे लक्ष देण्याची मागणी आहे.

दुग्ध भेसळीच्या चौकशीची मागणी

सौंदड : दुधाची आवक कमी होऊनही दुधाचे वितरण व दुग्धजन्य पदार्थांची निर्मिती करण्यात येत आहे. दुधात भेसळ करून पदार्थ तयार करण्याच्या सपाटा सुरू आहे. याची चौकशी करण्याची मागणी आहे.

शेंडा परिसरात नेटवर्कची समस्या

सडक -अर्जुनी : तालुक्यातील ग्राम कन्हारपायली, शेंडा, आपकरीटोला, उशिखेडा, पाटीलटोला, लेंदीटोला, मोहघाटा, दल्ली, लेंडीटोला, हलबीटोला, पांढरी मोबाइल टॉवर नसल्याने ग्राहकांची अडचण होते.

अल्प खर्चाचे शुभमंगल प्रेरणादायी

सडक -अर्जुनी : कोरोनामुळे विवाह समारंभावर ही बंधने आली आहेत. थेट आठ महिन्यांपासून बंद असलेली सामाजिक परंपरेतील अत्यंत महत्त्वाचा घटक असलेली विवाह परंपरा सुरू झाली आहेत.

कचरापेट्यांअभावी दुर्गंधी बळावली

गोंदिया : येथील विविध वॉर्डांत नगर परिषदेच्या वतीने कचरा पेट्या ठेवण्यात न आल्याने ठिकठिकाणी कचरा पसरलेला दिसतो. कुजलेल्या कचऱ्यामुळे किड्यांचा प्रकोप वाढला वाढला आहे.

रस्ता बांधकामामुळे शेतकरी व गावकरी अडचणीत

नवेगावबांध ­: कोहमारा ते नवेगावबांध-वडसा तसेच सानगडी - नवेगावबांध या राज्य महामार्गाचे काम शिवालया कंपनीद्वारे केले जात आहे. यात रस्त्याच्या दोन्ही बाजूंना ज्या ठिकाणी वस्ती आहे, त्या ठिकाणी, सिमेंट काँक्रिटचे रोड व दोन्ही बाजूंना साधारण तीन फूट उंचीची नाली तयार केली जात आहे. यामुळे रस्त्याच्या दोन्ही बाजूंना जिथे घरे व शेती आहे. अशा ठिकाणी दोन्ही बाजूंना सर्व्हिस रोड नसल्याने शेतकऱ्यांना व नागरिकांना त्रास सहन करावा लागत आहे.